Google ընկերությունը իր վիրտուալ Android Market 22 խանութից հեռացրել է հավելվածները, որոնք խարդախ ծրագրեր էին պարունակում: Դրանք հավանաբար ստեղծել են ռուս ցանցահենները:
Angry Birds և այլ հայտնի ծրագրերի անվան տակ թաքնված այդ հավելվածները օգտատերերին ստիպում են ուղարկել տեքստային հաղորդագրություններ` խլելով մեծ գումար:
Ի տարբերություն այլ ընկերությունների, որոնք գործում են հավելվածների շուկայում, Android Market-ը մինչ հաճախորդներին առաջարկելը` չի ստուգում հավելվածները:
Google-ը սկսել է արագ տեմպերով հեռացնել հավելվածները, որոնք չեն համապատասխանում անվտանգության պահանջներին:
Lookout ընկերությունը, որն ապահովում է բջջային կապի սարքավորման անվտանգությունը, ենթադրում է, որ ծրագրավորող-ցանցահենների հետքը տանում է Ռուսաստան, այստեղից էլ RuFraud անվանումը:
BBC-ին տված հարցազրույցում Google ընկերության ներկայացուցիչները հաստատել են, որ հեռացրել են բոլոր հավելվածները, այդ թվում` Angry Birds, Tetris, Need for Speed և Sim City:
Lookout ընկերությունը հայտնաբերել է հայտնի ծրագրերի ևս հինգ կեղծ տարբերակներ , որոնք պարունակում են RuFraud: Ըստ Lookout ընկերության` RuFraud պարունակով հավելվածները ներբեռնվել են մոտ 14 հազար անգամ:
Նշենք, որ վերջին ամիսներին շուկայում մեծացել է «վարակված» հավելվածների թիվը:
Նախկինում Google-ին բազմիցս քննադատել են վտանգավոր հավելվածների դեմ պայքարում համապատասխան ջանքեր չգործադրելու պատճառով: Նրա մրցակիցները, մասնավորապես Microsoft և Apple ընկերությունները, թեստավորում են բոլոր հավելվածները` նախքան օգտատերերին առաջարկելը: Դեռ ավելին, Amazon-ը Android հարթակի համար ներմուծել է իր սեփական խանութները` ապահովելով լրացուցիչ ստուգումներ:
