Կհաջողվի՞ արդյոք Սերժ Սարգսյանին հասնել նրան, որ Գագիկ Ծառուկյանի Բարգավաճ Հայաստանը համապետական ընտրություններին մասնակցի Հանրապետական կուսակցության հետ միասնական ցուցակով: Եթե հաջողվի՝ կնշանակի, որ Հայաստանի քաղաքական դաշտում մի կուսակցական սուբյեկտ դադարեց գոյություն ունենալ: Խոսքը, բնականաբար, Բարգավաճ Հայաստան կուսակցության մասին է: Եթե այդ կուսակցությունը ՀՀԿ հետ նույն ցուցակով մասնակցի խորհրդարանական ընտրություններին ապա անկասկած է, որ այդ կուսակցությունը Հայաստանի քաղաքական ներկապնակում չի կարող ներկայանալ իբրև քաղաքական առանձին միավոր:
2013 թ. Սերժ Սարգսյանի թեկնածության մասին «հաջորդ դասին» ասող քաղաքական ուժը, որը ամիսներ առաջ հայտարարել էր, թե դնելու է խորհրդարանական ընտրություններում 50+1 տոկոս շահելու խնդիր, ապա այդ իսկ պահից Ծառուկյանը դադարում է քաղաքական գործոն լինել: Նա արդեն դառնում է Արթուր Բաղդասարյան, այսինքն` ՀՀԿ կցորդ, որի ճակատագիրը ամբողջությամբ կախված է լինում միայն ու միայն ՀՀԿ կամքից ու ճակատագրից:
Ինչպես ՕԵԿ-ն է այսօր դարձել ՀՀԿ պահանջների սպասարկուն, այդպես էլ Գագիկ Ծառուկյանն է վերածվելու ՀՀԿ-ին սպասարկող մի կառույցի: Շատերի համար միգուցե սա նորություն չթվա, և շատերը միգուցե ասեն, որ Ծառուկյանը միշտ էլ եղել է ՀՀԿ-ին կամ Սերժ Սարգսյանին սպասարկողը, սակայն դա, իհարկե, այդպես չէ, որովհետև Ծառուկյանն ակնհայտորեն դիմադրում է, ինչի վկայությունն այն է, որ համաձայնությունը բավական դժվարությամբ է կայանում:
Ծառուկյանը շատ լավ գիտակցում է, որ իրեն արթուրբաղդասարյանացում է սպառնում: Բայց, ըստ երևույթին, Ծառուկյանը չի կարողանում ուժ գտնել Սերժ Սարգսյանի ճնշումներին դիմակայելու համար:
Չի բացառվում նաև, որ այստեղ գործ ունենք ոչ թե Ծառուկյանի, այլ Ռոբերտ Քոչարյանի որոշման հետ, որը իքս պահին խառնվեց գործընթացներին իր հարցազրույցով, միգուցե ինչ-որ պայմանավորվածություն ձեռք բերեց Սերժ Սարգսյանի հետ, որ դրանից հետո իգրեկ պահին էլ հանձնի Ծառուկյանին:
