Փորձագետ Մանան Գալստյանը E էլեկտրոնային պարբերականի (ejournal.am) իր բլոգում գրում է.
Սպառողների միության նախագահ Արմեն Պողոսյանը նախօրեին հայտարարել է, որ մենք շաքարավազ գնելով, փաստորեն, ահագին ջուր ենք գնում, քանի որ շաքարավազի մեջ խոնավության տոկոսը զգալիորեն գերազանցվում է: Իսկ հաց առնելիս ” կարծում ենք, որ գնում ենք հաց, բայց գնում ենք մոտավորապես 20-30 տոկոս օդ”: Դե ինչ, փաստորեն մենք ամեն օր գնում ենք մեր հայրենիքի օդն ու ջուրը:
Առաջարկում եմ միավորել առաջին անհրաժեշտության մթերքների վաճառքն ու տուրիզմի զարգացումը և հացն ու շաքարավազը վաճառել վերնիսաժում` համապատասխանաբար «հայրենիքի օդ» ու «հայրենիքի ջուր» պիտակներով:
Հնարավորությունները բազմազան են նաև մեր տեղացի սպառողների համար. գյուտարարները կարող են մտորումների նոր նյութ գտնել` ի դեմս շաքարից ջուր քամող և հացից օդ քամող ինքնաշեն հարմարանքներ ստեղծելու անհրաժեշտության:
Բայց առաջընթացն, ամեն դեպքում, հսկայական է. հին հայերը քարից հաց էին քամում, իսկ մենք` ընդամենը հացից օդ: Իսկ ոմանք էլ օդային հացերով ու ջրալի շաքարավազով մեզ են քամում: Ամեն օր:
