«Առեքսիմբանկն առաջարկում է դպրոցական վարկեր: Խրվե՛ք մանկուց»: Այս վերջին սերնդի անեկդոտը «Առաջին լրատվական»-ին պատմեց Հայաստանի վաճառականների միության նախագահ Ցոլվարդ Գևորգյանը՝ մեր հարցին ի պատասխան, թե ՓՄՁ-ներին տրամադրվող վարկերի ոլորտում ի՞նչ փոփոխություններ կան:
«Անունը դրել ենք ACBA-CREDIT Agricol` Գյուղփոխօգնության բանկ: Փորձե՛ք ոտք դնել այնտեղ, 24%-ից ցածր չեն տալիս: Նույնը Պրոկրեդիտ բանկում է, 24% գյուղացիական վարկեր են տալիս, ճիշտ է՝ մինչև 2 մլն են տալիս, բայց մեկ է՝ 24%»,- ասաց Ց. Գևորգյանը՝ հավելելով, որ մնացած բանկերում էլ գրեթե նույն բանն է: ՓՄՁ զարգացման վարկային կազմակերպությունները 12-13%-ով են տալիս, սակայն, ըստ նրա, ընդհանրապես աշխարհի մասշտաբով, երևի Հայաստանից բարձր վարկային տոկոսադրույք ոչ մի տեղ չկա:
«Մարզերում բոլորը, բոլորը պարտք են բանկերին: Այդ պայմաններում բիզնես կաշխատի՞: Չի՛ աշխատի, երբե՛ք»,- ընդգծեց նա:
Ց. Գևորգյանի խոսքով, բոլոր դեպքերում ընդհանուր հաշվարկ անելիս բիզնեսի համար տոկսադրույքը 30%-ն անցնում է: Փաստորեն, ստացվում է, որ ապրանքը պետք է առնվազն նույնքան մարժայով վաճառվի, մինչդեռ հարևան սուպերմարկետը 4-5%-ով է ծախում, ու մանրերը չեն կարողանում մրցակցել: Ըստ միության նախագահի՝ այդ բոլորի պատճառը բանկերն են: Նա նշեց, որ ավելի շատ վարկեր վերցնում են խոշորները՝ իրենց ուզած տոկոսներով: «Ամեն բանկ, ում համար բացվել է, սպասարկում է այդ մարդու օբյեկտները, որոնք սնկերի նման աճում են, դրա համար էլ վարկավորման ընդհանուր ծավալներն ավելացել են: Բայց մտեք մարզեր, հարցրեք՝ ինչքա՞ն վարկ են վերցրել և ո՞վ: Եթե խորը ուսումնասիրություն արվի, կտեսնեք, որ 200-300 մլն դրամանոց վարկեր են, որոնք սպասարկում են խոշոր բիզնեսը: Բայց դրանցից պետությանն օգուտ չկա: Դրանք այն բիզնեսներն են, որոնք հարկ չեն մուծում, մի թուլափայ են գցում պետությանը, մնացածը՝ խժռում»,- փաստեց Ց. Գևորգյանը:
