«Մենք դե՛մ ենք օտարալեզու դպրոցների վերաբացմանը» նախաձեռնության անդամները փաստում են, որ այսքան ժամանակ իշխանության տարբեր գործիչների մոտ ոչ կոմպետենտ հայտարարությունների մի շարան է եղել ՀՀ «Լեզվի մասին» օրենքի փոփոխությունների հետ կապված, որոնց պետք է ուշադրություն դարձնել: Արայիկ Հարությունյանի խոսքերով, վարչապետը հայտարարում է` երկու դպրոց է բացվելու, հետո հայտարարում է` ո՛չ, այդպես չէ: Աշոտյանն իր խոսքերում այնպես է ներկայացնում այդ ուսուցման պրոցեսը, որից կարելի է եզրակացություններ անել, որ հայերենն այս առումով կվերածվի կենցաղային լեզվի. «Հա բայց ի՞նչ է եղել, կգնան տանը հայերեն կխոսեն, փողոցում կխոսեն»: Եվ երբ ասում ես, որ դու դրանով հայոց լեզուն վերածում ես կենցաղային լեզվի, ասում է` ես այդպիսի բան չեմ ասել։ Եվ վերջինը` Հովիկ Աբրահամյանը, Արտակ Դավթյանը, Արմեն Աշոտյանը, Հրանուշ Հակոբյանը հայտարարում են, որ նախագահի մոտ որոշում է կայացվել, որ լեզվի մասին օրենքը հանված է փաթեթից ու այն այլեւս չի քննարկվելու։ Ու հանկարծ այդ մարդիկ ասում են, որ չեն կարող հանել օրենքը, որովհետեւ իրավաբաններն իրենց ասել են, որ անհնար է առանց «Լեզվի մասին» օրենքի փոփոխության, այսինքն` այստեղ պետք է շատ լուրջ հետեւություն անել ե՛ւ օրենքը գրողների, ե՛ւ կիրառողների, ե՛ւ, ընդհանրապես, կրթության կառավարմամբ զբաղվողների մասին:
Արայիկ Հարությունյանը փաստում է, որ նախաձեռնությունը հիմա մի փաստաթուղթ է նախապատրաստում, որում նշվելու են այս նախագծի բացերը կետ առ կետ: Այն հարցին, թե որոնք են նախաձեռնության հետագա քայլերը, Հարությունյանը նշեց, որ խումբն անելու է այն ամենը, ինչ արել է վեց ամիս շարունակ` տարբեր մեթոդներով իրազեկել օրենքի բացերի, դրա անթույլատրելիության, հնարավոր շատ մարդկանց ներգրավել պայքարի մեջ, պայմաններ ստեղծել, որպեսզի օրենքով զբաղվողներն էլ ավելի խճճվեն իրենց գործողություններում:
Արայիկ Հարությունյան. «Մենք հիմա մի փաստաթուղթ ենք պատրաստում, որում նշելու ենք այս նախագծի բացերը կետ առ կետ: Իսկ բացասական երեւույթները, որ առաջանալու են այս օրենքներն ընդունելուց հետո բազամազան են` սկսած հանրակրթությունից մինչեւ բարձրագույն կրթություն»։
Նախաձեռնության մեկ այլ անդամ Արմեն Հովհաննիսյանն էլ ավելացրեց, որ «այսպես հարաբերվել հասարակության հետ, այսինքն`սուտը դարձնել հիմնական զենք, չի կարելի»: Առաջիկայում նախաձեռնության անդամները պատրաստվում են անել այն, ինչ միշտ են անում: Սակայն ավելացնում են. «Մենք գրպանում դրված բաներ չունենք, հավաքվում ենք, քննարկում ենք, ծնվում են գաղափարներ, մտահղացումներ»:
