«Առաջին լրատվականը» Հայ ազգային կոնգրեսի մամլո խոսնակ Արման Մուսինյանից հետաքրքրվեց, թե արդյոք ՀՀ իշխանական վերնախավում տեղի ունեցող պաշտոնանկությունները Սերժ Սարգսյանի իշխանությունը լեգիտիմացնելու փորձ չեն: «Այդ ողջ պատմությունը սեփական թիմում ահագնացող խմորումները կանխելուն են ուղղված: Իր թիմի ներսում պատժիչ գործողություններ իրականացնելով` նա փորձում է հանդարտեցնել այնտեղ եղողներին: Որևէ այլ պատճառ չկա: Որպեսզի կոռուպցիայի դեմ ծավալվի պայքար, չլինեն անպարկեշտ պաշտոնյաներ, պետք է առաջին հերթին հրաժարական տա Սերժ Սարգսյանը: Թե չէ իրենք իրենց միջից փնտրում են ինչ-որ նոխազների, նրանց մատաղ են անում, որպեսզի թիմը շարունակի սարսափել Սերժ Սարգսյանից, կատարի նրա բոլոր հրահանգները»,- ասաց Արման Մուսինյանը: Նա կարծիք հայտնեց, որ իշխանություններն ամեն ինչ փորձում են անել, որպեսզի չլինեն արտահերթ համապետական ընտրություններ, որովհետև արտահերթ ընտրությունները լինելու են այս իշխանությունների գերեզմանափորը: Հարցին, թե բարեփոխումների գնալն իշխանության ներսում, հնարավո՞ր է, որ պարտադրված լինեն դրսից, Արման Մուսինյանն արձագանքեց. «Այս իշխանությունն իր բնույթով չի կարող իրականացնել բարեփոխումներ, քանի որ հակոտնյա է օրինականությանն ու արդարությանը: Սերժ Սարգսյանն, անկասկած, դրսից նույնպես ենթարկվում է ուժեղ ճնշումների: Մյուս կողմից էլ իր վարչախմբի ներսում կան գլուխ բարձրացնողներ, և ինքը հուսահատ փորձեր է անում կասեցնել այդ պրոցեսը»: Արման Մուսինյանից հետաքրքրվեցինք, թե որքանով են համապատասխանում իրականությանն այն լուրերը, որ Կոնգրեսն ակնկալում է պաշտոնանկ արված գործիչների ստվերային աջակցությունը: «Դա չի համապատասխանում իրականությանը: Կոնգրեսն իր բոլոր գործողություններն իրականացնում է բաց և թափանցիկ: Իսկ եթե որևէ գործիչ, ցանկանում է վերականգնել իր բարի համբավը հասարակության աչքում, պետք է պայքարի այս իշխանությունների դեմ»,- ասաց մեր զրուցակիցը: