«Առաջիկա ընտրությունները կլինեն մեր ցանկությունների ճիշտ հակառակը: Յուրաքանչյուր տարի սկսում ենք զրոյից` մոռանալով անցած վատը, բայց տարեվերջին կրկին հայտնվում ենք կոտրած տաշտակի առաջ: Այս ընտրություններն էլ կլինեն մեր ցանկություններից շատ և շատ հեռու»,- այսօր ասուլիսին հայտարարեց կառավարման փորձագետ Հարություն Մեսրոպյանը:
Նրա բնորոշմամբ` 1995-1996 թթ.-ից պարբերաբար նույն երգն են երգում, հասարակությունը սկսում է քննարկել` ով քանի տոկոս կհավաքի, կանցնի-չի անցնի, բայց շատ գործիչներ այդ ամենին լուրջ չեն վերաբերվում` տեսնելով, որ նույն տրամաբանությունն է գործում ընտրություններին:
Ինչպես ներկայացրեց Հ.Մեսրոպյանը` թեև հայտարարում են, թե սոցիալական քաղաքականություն են վարում, բայց վերջին տարիներին աղքատությունն անցավ 35%-ը.ինչպե՞ս կարելի է քաղաքականությունը համարել սոցիալական, երբ աղքատությունն ավելանում է: Այս պարագայում, ըստ փորձագետի, կամ քաղաքականությունն է հակասոցիալական, կամ մեզ թվում է, թե կա աղքատություն:
Ըստ բանախոսի` հայտարարում էին, թե տնտեսության վատ վիճակի պատճառը շրջափակումն է, և սկսվեց հայ-թուրքական հաշտեցման գործընթացը: Բայց եթե ներկրման ծավալներն ավելի մեծ են, քան արտահանման, այդ ինչպե՞ս է, որ առաջին դեպքում ճանապարհներ կան, ու խնդիրներ չեն առաջանում:
«Հայտարարվեց, թե հայրենիքը կանչում է սփյուռքահայերին, բայց ի՞նչ եղավ. վերջին դեպքը հետևյալն է. «Նարեկացի» միության հիմնադիր Նարեկ Հարթունյանին բռնեցին, տարան, իսկ դատարանը գիշերով ձերբակալման որոշում կայացրեց: Մենք քնում ենք, իսկ դատարաններն աշխատում են: Մի՞թե մեր օլիգարխները իրենց պարտավորությունները կատարում են, և մնացել է վերջին լումայի խնդիրը լուծել»,- նշեց Հ. Մեսրոպյանը` շեշտելով, որ Նարեկը լիովին անկախ մարդ է, և միգուցե այստեղ նաև այն հարցն էր, թե ազատագրված տարածքում Նարեկը գյուղ է կառուցել:
Նրա խոսքով` կա այլընտրանքային կառույցների ստեղծման խնդիր. այդ մոտեցման հայրենիքը Արևմուտքի մեխերից մեկն է` դեմոկրատական Անգլիան, որի 3 խոշոր կուսակցություններն ունեն ստվերային կառավարություն: Դա նշանակում է, որ ֆորս-մաժորային իրավիճակներում կա պրոֆեսիոնալ կառավարական թիմ, և ոչ թե բերում են «լավ մարդ» լինելու համար ու սկսում աշխատել իրենց համար:
Հ. Մեսրոպյանը նշեց, որ «Սարդարապատ» շարժումն էլ է հանդես եկել նման մի այլընտրանքային խորհրդարանի առաջարկով, բայց այդ առաջարկը մնաց անպատասխան:
«Ուզում ենք ոչ թե ընտրություններ, այլ շոու. սկզբում` հավատ-հույս, հետո` վայ-վույ»,- ասաց փորձագետը` հավելելով, որ կուսակցությունների ծրագրերն ամբողջովին նույնն են. դրանք բաժակաճառեր են, ոչ թե ծրագրեր:
