Թուրքական Dünya Bülteni կայքի փոխանցմամբ՝ Թուրքիայի արտգործնախարար Ահմեդ Դավութօղլուն զանգահարել է իր իրանցի գործընկեր Ալի Աքբար Սալեհիին։
Հեռախոսազրույցի ժամանակ Դավութօղլուն Սալեհիից պարզաբանում է պահանջել Թուրքիայի տարածքում ՆԱՏՕ-ի ռադիոտեղորոշիչ կայանի (ՌՏԿ) տեղակայման վերաբերյալ մի շարք իրանցի բարձրաստիճան զինվորականների կողմից հնչած սպառնալիքների կապակցությամբ։
Դա մասնավորապես վերաբերում է արտաքին քաղաքականության ու ազգային անվտանգության հարցերով Իրանի խորհրդարանի հանձնաժողովի փոխղեկավար Հուսեին Իբրահիմիի երկու օր առաջ հնչեցրած այն հայտարարությանը, թե Իրանի զինված ուժերը մշակել են Թուրքիայի տարածքում տեղակայվելիք ՆԱՏՕ-ի հակահրթիռային պաշտպանության (ՀՀՊ) համակարգի վնասազերծման պլանը։
Սալեհին նկատել է, որ այդպիսի սպառնալիքները վերաբերում են միայն տվյալ մարդկանց և չեն արտացոլում իրանական կառավարության դիրքորոշումը։
Հիշեցնենք, որ Հուսեին Իբրահիմից առաջ էլ Իրանի իսլամական հեղափոխության պահակազորի օդատիեզերական զորքերի հրամանատար, գեներալ Ամիր Ալի Հաջիզադեն հայտարարել էր, որ իր երկրի՝ հարձակման ենթարկվելու դեպքում իրենց թիրախում ամենաառաջինը հայտնվելու է Մալաթիայի ՌՏԿ-ն, որը տարբեր տվյալներով՝ գտնվում է թուրք-իրանական սահմանից 540-700 կիլոմետր հեռավորության վրա։
