Մարտի 1-ի զոհերից Տիգրան Խաչատրյանի մայրը՝ Ալլա Հովհաննիսյանը, չի կարծում, որ այս շաբաթ ներկայացվելիք, 2008-ի մարտիմեկյան իրադարձությունների բացահայտման ուղղությամբ շուրջ 4 տարի ընթացող աշխատանքների մասին զեկույցը իր մեջ լուրջ գնահատականներ կպարունակի: Նման տեսակետ նա հայտնեց «Առաջին լրատվական»-ի հետ զրույցում:
«Երեկ դիտում էի դատախազ Կորյուն Փիլոյանի հարցազրույցը: Ինձ թվում է՝ զեկույցի գլխավոր հեղինակը նա է: Իր խոսելուց համենայնդեպս հասկացա, որ այդ զեկույցում սպանությունների բացահայտման հետ կապված որևէ բացահայտում չկա: Այդ զեկույցի միակ նպատակը զոհերի ծնողների ուշադրությունը շեղելն է:
Փիլոյանի խոսքից հասկացա, որ այս անգամ անպայման ուզում են զոհերին վարկաբեկած լինեն՝ շեշտելով, որ զոհվել են ոչ թե խաղաղ ցույցի, այլ անկարգությունների մասնակիցներ: Նրա այդ բառերից զգացի, որ միջանկյալ այդ զեկույցից սպասելիքներ ընդհանրապես չպետք է ունենալ: Ուղղակի սպասում ենք զեկույցը հրապարակվի, որպեսզի բողոքով մի քանի տեղ դիմենք: Կհանդիպենք ՄԻՊ Կարեն Անդրեասյանին, «Մարտի 1»-ի գործով քննչական խմբի նոր ղեկավարին, նամակներ կհղենք եվրոպական կառույցներին: Մի խոսքով, սպասվելիք զեկույցից ոչ մի ակնկալիքներ էլ չունենք:
Կորյուն Փիլոյանն այնպիսի բացահայտումներ արեց, որոնք մեզ համար նորություն էին: Օրինակ՝ կոնկրետ այն, որ Եվրախորհրդի Մարդու իրավունքների հանձնակատար Թոմաս Համարբերգն իրեն ասել է, որ ինչ-որ փորձագետ են հրավիրել, որը չի կարողացել «Չերյոմուխա»-ն նույնականացնել, իսկ մեզ հետ հանդիպման ժամանակ ԵԽԽՎ Հայաստանի հարցով համազեկուցող Ջոն Պրեսկոտն ասել էր, որ իրենց մոտ համապատասխան մասնագետներ կան, ուղղակի Հայաստանը պետք է կամք ունենա, որ այդ հարցով դիմի իրենց: Հիմա արդեն ուրիշ բան են ասում:
Փիլոյանի երեկվա ելույթը մեզ համար շատ անսպասելի, մերժելի ելույթ էր, դրա համար էլ զեկույցից ոչ մի սպասելիք էլ չունենք»,- ամփոփեց Ալլա Հովհաննիսյանը:
