ԱԺ ԲՀԿ-ական պատգամավոր Ռոբերտ Թովմասյանին խնդրեցինք մեկնաբանել Սերժ Սարգսյանի` ՀՀԿ 20-ամյակի հանդիսավոր նիստում ունեցած ելույթի հատվածը, որտեղ նա հաստատել է մամուլի հրապարակումները, թե ինքը ԲՀԿ-ից պահանջել է` կողմնորոշվել նախագահի թեկնածուի հարցում: «Այստեղ ուզում եմ անդրադառնալ այն ասեկոսեներին, այն խոսակցություններին, որ վերջին շրջանում պտտվում են որոշ քաղաքական շրջանակներում, թե իբր ես վերջնագիր եմ ներկայացրել «Բարգավաճ Հայաստան» կուսակցությանը: Եվ ղեկավարվելով իրենց տրամաբանությամբ՝ իրենց իսկ ժարգոնով ասած՝ փորձում են թասիբի գցել «Բարգավաճ Հայաստան» կուսակցությանը և կոնկրետ Գագիկ Ծառուկյանին: Բոլորիդ է հայտնի, որ ես երբեք որևէ մեկի հետ վերջնագրով չեմ խոսել, մանավանդ` իմ գործընկերների հետ: Նրանց ասած այդ վերջնագրերը պարզապես իմ պահանջներն են ինչպես իմ կուսակիցների, այնպես էլ մեր կոալիցիոն գործընկերների նկատմամբ: Կարծում եմ, որ սա օրինաչափ է, և հակառակը ենթադրելը պարզապես անտրամաբանական է»,-հայտարարել էր Սերժ Սարգսյանը:
ԲՀԿ-ական Ռոբերտ Թովմասյանը, մեզ հետ զրույցում անդրադառնալով այդ փաստին, ասաց, որ նախագահի թեկնածու առաջադրելու կամ որևէ մեկին սատարելու հարցը որոշում է ԲՀԿ քաղխորհուրդը: «Եթե մտնում ես կոալիցիայի մեջ, ապա կոալիցիոն գործընկերներն ունենում են իրավունքներ ու պարտականություններ: Այդ հարցը քաղաքական որոշման խնդիր է, որը կախված է կոնկրետ իրադրությունից: Կգա ժամանակը, և ԲՀԿ-ն իր որոշումը կհայտարարի»,- ասաց ԲՀԿ-ական պատգամավորը: Իսկ թե ինչու է Սերժ Սարգսյանը պահանջներ առաջ քաշում, նա ասաց. «Ես չգիտեմ` ինչ պահանջների մասին է խոսքը: Բայց եթե մտել ես կոալիցիայի մեջ, պետք է հարգես կոալիցիոն գործընկերոջ կարծիքը, ինքն էլ՝ հարգի քո կարծիքն ու իրավունքները:
