ԱՄՆ իշխանություններն առաջին անգամ թույլատրել են իրենց քաղաքացիներին մասնակցել Կուբայում այս շաբաթ կայանալիք Jazz Plaza ջազ փառատոնին: Այս մասին հաղորդում է РИА Новости-ն՝ վկայակոչելով կուբայական մամուլը:
Jazz Plaza 27-րդ փառատոնը տեղի կունենա Կուբայի մայրաքաղաք Հավանայում՝ դեկտեմբերի 15-18-ը: Փառատոնին մասնակցելու հայտ են ներկայացրել շուրջ 300 ջազ երաժիշտներ արտասահմանից, հիմնականում՝ ԱՄՆ-ից և Կանադայից:
Կուբա մեկնելու թույլտվություն է ստացել ամերիկյան JazzTimes ամսագիրը և Insight Cuba մշակութային զբոսաշրջության գործակալությունը:
Հիշեցնենք, որ հունվարից ԱՄՆ իշխանությունները հայտարարել էին, թե փոխում են իրենց քաղաքականությունը Կուբայի նկատմամբ: Սպիտակ տունը թույլատրել է իր քաղաքացիներին Կուբա մեկնել ակադեմիական, կրթական և մշակութային նպատակներով:
