Freedom House իրավապաշտպան կազմակերպությունը հրապարակել է տարվա ընթացքում մարդու իրավունքների ոլորտում լավագույն և վատթարագույն զարգացումները` յուրաքանչյուր խմբում նշելով հինգ փաստ:
Հեղինակավոր իրավապաշտպան կազմակերպությունը ամփոփում է տարվա ընթացքում տեղի ունեցած իրադարձությունները, որոնք նպաստել կամ խոչընդոտել են մարդու իրավունքների պաշտպանությանը:
Ինչպես տեղեկացնում է «Ազատություն» ռադիոկայանը, մարդու իրավունքների ոլորտում դրական զարգացումների շարքում Freedom House-ը առաջինը նշում է «արաբական գարունը»` արաբական աշխարհում ընտրությունները որակելով պատմական:
Թունիսում, Եգիպտոսում բռնապետներին տապալելուց հետո խաղաղ ընտրությունները տարածաշրջանում խոստանում են հետագա ժողովրդավարական առաջընթաց:
Որպես մարդու իրավունքների ոլորտում տարվա լավագույն դրսևորում իրավապաշտպան կազմակերպությունը նշում է նաև աշխարհի համախմբված ջանքերը` լիբիացի ժողովրդին Մուամար Քադաֆիի ռեժիմի վայրագություններից պաշտպանելու համար:
40 տարի բռնապետությունից հետո Լիբիան առաջին անգամ ժողովրդավարական ընտրություններ անցկացնելու հնարավորություն ունի, փաստում է Freedom House-ը:
Երրորդ դրական զարգացումը կազմակերպությունը համարում է Կոտ դ՛Իվուարի նախկին նախագահ Լորան Գբագբոյի` Միջազգային քրեական դատարանում հայտնվելը: Նա տապալվել է իր պաշտոնից այն բանից հետո, երբ հրաժարվեց ընդունել իր պարտությունը երկար սպասված ընտրություններում, և կդառնա առաջին նախագահը, ով կդատվի Միջազգային քրեական դատարանում:
Միջազգային հանրության միասնական ջանքերը Գբագբոյին հեռացնելու և միջազգային դատարան հանձնելու ուղղությամբ պետք է, որ այլ առաջնորդների համար զսպող հանգամանք լինի, երբ նրանք չեն ցանկանում ընդունել ընտրությունների արդյունքներն ու փորձում են բռնի ուժով պահել իշխանությունը։
Ժողովրդավարության բնագավառում այս տարվա ձեռքբերումներից Freedom House-ը համարում է նաև Հնդկաստանի քաղաքացիական հասարակության պայքարը կոռուպցիայի դեմ։
Այն սկսվեց մեկ մարդուց` 74-ամյա Անա Հազարեից և արագորեն վերաճեց համընդհանուր քաղաքացիական պայքարի։ Հազարեն հացադուլ հայտարարեց` ստիպելու համար կառավարությանը հակակոռուպցիոն միջոցառումներ իրականացնել, որը տվեց իր արդյունքը:
Այս տարվա ընթացքում որպես ձեռքբերում Freedom House-ը նշում է նաև Բիրմայում բարեփոխումների նախանշանները: Այդ երկիրը, որը Freedom House-ը երկար ժամանակ դիտարկում էր որպես վատթարագույնը մարդու իրավունքների խախտումների առումով, վերջերս սկսել է ազատ արձակել որոշ քաղբանտարկյալների եւ թույլատրել է ընդդիմադիր կուսակցությանը գրանցվել:
Արաբական պետությունների լիգան նոյեմբերին աննախադեպ քայլ է կատարել` կասեցրել է Սիրիայի անդամությունը կազմակերպությունը և քվեարկել Սիրիայի նկատմամբ պատժամիջոցների օգտին, պահանջելով այդ երկրի ղեկավար Բաշար Ասադից դադարեցնել արյունահեղությունն ու խաղաղ ցուցարարների նկատմամբ բռնաճնշումները։
Արաբական լիգայի պետությունների այս դիրքորոշումը ևս Freedom House-ը դրական զարգացում է համարում:
Ինչ վերաբերում է մարդու իրավունքների ոլորտում 2011 թվականի բացասական զարգացումներին, ապա հեղինակավոր իրավապաշտպան կազմակերպությունը առանձնացրել է Պակիստանում շարունակվող մահացու անպատժելիությունը` տարվա ընթացքում լրագրողների եւ ընդդիմադիրների աղմկալի սպանությունները, Աֆրիկայում` միասեռականների հետապնդումներն ու սպանությունները, Բահրեյնի նկատմամբ միջազգային հանրության անտարբերությունը:
Չնայած ինչպես արաբական աշխարհի այլ հատվածներում` Բահրեյնում ևս կառավարական ուժերը բարեփոխումներ պահանջող ցուցարարների նկատմամբ անհամաչափ ուժ են կիրառում, այնուամենայնիվ, ՄԱԿ-ը որևէ բանաձև Բահրեյնի վերաբերյալ չի ընդունել և պատժամիջոցներ այդ երկրի նկատմամբ չեն կիրառվում: Միացյալ Նահանգներն անգամ հայտարարել է իր դաշնակիցը համարվող Բահրեյնին 53 միլիոն դոլարի զենք վաճառելու մասին:
Որպես տարվա ձախողում մարդու իրավունքների ոլորտում Freedom House-ը դիտարկում է Եգիպտոսում քրիստոնյա փոքրամասնության, մասնավորապես` քրիստոնյա ղպտիների զանգվածային սպանությունները։
Եվ վերջապես, Freedom House-ը հետընթաց է համարում նաև Միացյալ Նահանգների միգրացիոն օրենսդրության խստացումը. որոշ նահանգներում ոստիկանությունը կարող է կարգավիճակը հաստատող փաստաթղթեր պահանջել առօրյա շփումներում, և անգամ երեխաներից` հանրակրթական դպրոցում։
