«ՀԺ»-ն գրում է, որ երեկ տեղեկություն է հայտնվել, ըստ որի՝ ռուսաստանաբնակ հայ գործարարների մասնակցությամբ ավանդական մոսկովյան ճաշկերույթը, որն ամեն տարի կազմակերպվում է հիմնադրամի դրամահավաքի շրջանակներում, և որին սովորաբար մասնակցում է Սերժ Սարգսյանը, տեղի կունենա ս/թ. դեկտեմբերի 21-ին:
«Մինչև երեկ միջոցառման ամսաթիվը պաշտոնապես հայտնի չէր, իսկ ոչ պաշտոնապես նշվում էր դեկտեմբերի 2-ը: Որ այս տարվա մոսկովյան ճաշկերույթի հետ կապված որոշակի բարդություններ կան, հայտնի էր ի սկզբանե: Սովորաբար այդ միջոցառումն արվում է հեռուստամարաթոնից առաջ, համենայնդեպս, այդպես է եղել վերջին մի քանի տարիներին: Այս տարի, սակայն, լոսանջելեսյան հեռուստամարաթոնը տեղի է ունեցել նոյեմբերի 24-ին, և այդ ժամանակ ճաշկերույթի օր նշանակված չէր:
«Հայաստան» համահայկական հիմնադրամում սա համարում են տեխնիկական հարց: Իրականում, սակայն, բոլոր հիմքերը կան պնդելու, որ հարցը միայն տեխնիկական չէ. այս տարի մոսկվահայության և Սերժ Սարգսյանի հարաբերությունները լարված են ավելի, քան երբևէ: Սովորաբար ճաշկերույթների ամենախոշոր նվիրատուներից մեկը՝ Սամվել Կարապետյանը, որը հայտնի է Կալուգայի Սամո անունով, այս տարի միջոցառմանը սառը վերաբերվելու լուրջ պատճառներ ունի. նրա եղբայրը հեռացվել է Սերժ Սարգսյանի աշխատակազմի ղեկավարի պաշտոնից, դրանից բացի, ի հեճուկս սպասելիքների, չի նշանակվել ՀՀ վարչապետ:
Մոսկվայում որոշակի ազդեցություն ունի նաև Երևանի նախկին քաղաքապետ Կարեն Կարապետյանը, որն, ինչպես հայտնի է, «Գազպրոմբանկի» փոխնախագահ դարձավ խորհրդավոր պայմաններում Հայաստանից հեռանալուց հետո: Ենթադրվում է, որ նա նույնպես Սերժ Սարգսյանի կազմակերպած դրամահավաքին աջակցելու «դրայվ» չի ունենա: Միջոցառմանը խոշոր նվիրատուներից մեկի՝ Արա Աբրահամյանի մասնակցությունն էլ է հարցական: Իսկ «Վիկիլիքսյան» վերջին բացահայտումներից հետո մոսկովյան դրամահավաքին սառը վերաբերմունք են ցուցաբերելու նաև ռուսաստանյան իշխանությունները:
Ինչ վերաբերում է ռուսաստանահայ մյուս գործարարներին, ենթադրվում է, որ նրանք որոշակի մասնակցություն են ունեցել Ռուսաստանի ընտրական գործընթացներին, և նրանցից խոշոր գումարներ ակնկալելու համար այնքան էլ լավ ժամանակաշրջան չէ:
Մեր աղբյուրները, ահա, այս ամենով են պատճառաբանում միջոցառման այսօրինակ աննախադեպ հետաձգումը և չեն բացառում, որ դա ամենախեղճն է լինելու գոյության ողջ պատմության ընթացքում: Թե այս պահին ինչ պայմանավորվածություններ են ձեռք բերվել ռուսաստանահայ գործարարների հետ, հայտնի չէ: Իրավիճակը փրկում է այն հանգամանքը, որ ինչպես Լոս Անջելեսում, այնպես էլ Մոսկվայում ոչ թե իրական դրամահավաք է տեղի ունենում, այլ ի մի են բերվում նվիրատվությունների խոստումները: Թե հետագայում դրանց որ մասն է իրականանում, երբեմն դժվար է ստուգել: Ամեն դեպքում, Սերժ Սարգսյանը մոսկովյան միջոցառման առումով կարող է հույս դնել «ԲԱՄՕ» ընկերության սեփականատեր Մուրադ Մուրադյանի, «Տրոյկա Դիալոգ» խմբի ղեկավար Ռուբեն Վարդանյանի և Աժ պատգամավոր Սամվել Սարգսյանի վրա, որը վաղամեռիկ եղբորից որպես ժառանգություն է ստացել «Արարատ Հայաթ» հյուրանոցը:
Բայց թե որքանով նրանք կկարողանան հաղթահարել Սերժ Սարգսյանի մոսկովյան լարվածությունը, դժվար է ասել: Հիմնադրամի հաղորդագրության մեջ, ի դեպ, ոչինչ ասված չէ, թե արդյոք Սերժ Սարգսյանն անձամբ է մասնակցելո՞ւ միջոցառմանը»:
