Զենքի առաքման շուկայում, մեծ հաշվով, ռազմավարական գործընկերներ չկան: Այնպես որ, Հայաստանի ռազմավարական գործընկեր Ռուսաստանի կողմից Ադրբեջանին Ми-35М տիպի 24 ուղղաթիռների վաճառքը զարմանք չպետք է առաջացնի: «Առաջին լրատվական»-ի հետ զրույցում նման տեսակետ հայտնեց ռազմական փորձագետ Արծրուն Հովհաննիսյանը:
«Առաջին անգամ չէ, որ նման պրակտիկայի ենք ականատես լինում: Եթե ուշադիր լինենք, ապա վերջին 3-4 տարում Ադրբեջանի թարմ, նոր սպառազինությունների մատակարարը Ռուսաստանն է: Զենքի շուկայում ռազմավարական գործընկերությունը այնքան էլ մեծ դեր չի կատարում, ուղղակի զուտ գումարային հարց է. ով պատվիրում է, վճարում, նա էլ ստանում է: Այս շուկայում գործում է «գնորդը միշտ արդարացի է» սկզբունքը: Այլ հարց է, որ այդ ուղղաթիռները Ми-24-ի կատարելագործված տարբերակն են, ուղղակի ավելի թարմ են, և սպառազինության լուրջ հարցեր չեն լուծում»,- նկատեց նա:
Հովհաննիսյանը նաև նկատեց, որ եթե Ռուսաստանը հրաժարվի սպառազինության, կոնկրետ դեպքում՝ ուղղաթիռների մատակարարումից, ապա կկորցնի իր շուկաները: «Այստեղ առկա է Ռուսաստանի նախանձախնդրությունը՝ չկորցնել իր զենքի շուկաները»,- ամփոփեց փորձագետը:
Ադրբեջանական APA լրատվական գործակալության փոխանցմամբ, մոտ ժամանակներս սկսվելու է Ռուսաստանից Ադրբեջանի գնած մարտական ուղղաթիռների հատկացման գործընթացը։ Խոսքը Ми-35М տիպի 24 ուղղաթիռների մասին է, որոնք գնելու պայմանագիրը Рособоронэкспорт ընկերությունը և Ադրբեջանի համապատասխան կառույցները ստորագրել են 2010 թվականի սեպտեմբերին՝ Բաքվում։ Առաջին ուղղաթիռն Ադրբեջան է ուղարկվելու Դոնի Ռոստովից։