Ոստիկանական շանը հաջողվել է հասնել և գետնին տապալել տղամարդուն, որը կասկածվում էր «Լիմուզին» գողանալու մեջ, և այդ կերպ օգնել իրավապահ մարմինների աշխատակիցներին ձերբակալել նրան: Ձերբակալման պահին տղամարդը մերկ էր:
Ինչպես հայտնում է Ninemsn կայքը, միջադեպը տեղի է ունեցել Կալիֆոռնիա նահանգի Իրվայն քաղաքում: Տղամարդը զենքով սպառնացել է ավտոմեքենայի վարորդին, ստիպել է նրան լքել այն, այնուհետև նստել է ղեկին և հեռացել: Ընդ որում՝ այդ ժամանակ տղամարդը հագնված է եղել: Հայտնի չէ, թե ինչ պատճառով է նա մերկացել:
Ավտոմեքենայի վարորդը դիմել է ոստիկանություն և հայտնել միջադեպի մասին: Իրավապահ մարմինների աշխատակիցները սկսել են իրականացնել որոնողական աշխատանքներ, գործի են դրվել մեքենաները և նույնիսկ ուղղաթիռ: Ինչպես նշում է Sky News-ը, մեքենան գողանալուց հետո տղամարդը 50 կմ-ի վրա այն թողել է ճանապարհին, մերկ դուրս եկել և փորձել թաքնվել դեպքի վայրից:
Չնայած այս ամենին, հանցագործին չի հաջողվել հեռու փախչել: Մի քանի վայրկյան անց նրա վրա է հարձակվել ոստիկանական շունը: Տղամարդը փորձել է դիմադրել, սակայն չի կարողացել շան երախից ազատվել: Մերկ գողին ձերբակալել են: Չի հստակեցվում՝ արդյոք նրան մեղադրանք առաջադրվե՞լ է, թե՞ ոչ:
