Իրանական IRNA լրատվական գործակալության փոխանցմամբ, Իրանի նախագահ Մահմուդ Ահմադինեժադը Մազանդարան կատարած այցի ժամանակ մեկնաբանել է Կասպից ծովի իրանական հատվածում խոշոր գազային հանքավայրի հայտնաբերումը.
«Գազային նոր հանքավայրի պաշարները կազմում են մոտ 1.4 տրիլիոն խորանարդ մետր։ Դա կարող է 10 տարիների ընթացքում բավարարել երկրի ներքին պահանջարկը։
Բացի այդ, նոր հանքավայրի հայտնաբերումը կարող է փոխել մերձկասպյան տարածաշրջանում տիրող էներգետիկ ու քաղաքական հավասարակշռությունը։ Մեր մասնագետներն այդ հանքավայրում հորատումներն իրականացնելու են հայրենական տեխնոլոգիաների օգնությամբ»։
Հիշեցնենք, որ գազային պաշարների ցուցանիշով Իրանը համայն աշխարհում զիջում է միայն Ռուսաստանին։ Նոյեմբերին Իրանի նավթի նախարարությունը հայտարարեց, որ Իրանի գազային պաշարները կազմում են 34 տրիլիոն խորանարդ մետր։ 2010 թվականին Իրանում արդյունահանվել է 138.5 միլիարդ խորանարդ մետր գազ։