Flight Global կայքը, որը մասնագիտացած է ավիացիայի աշխարհի նորությունների վրա, հրապարակել է Google Maps-ի միջոցով հայտնաբերված արբանյակային լուսանկարներ: Ենթադրվում է, որ այն ԱՄՆ Նևադա նահանգում տեղակայված է Յուկկա Լեյք (Yucca Lake) գաղտնի օդային բազան է: Այդ բազան նախատեսված է նորագույն անօդաչու թռչող սարքավորումների` RQ-170 Sentinel-ի գործարկման համար,- հայտնում է Fox News հեռուստաալիքը:
Ռազմաօդային ուժերի պաշտոնաթող գնդապետ Սեդրիք Լեյթոնը հայտարարել է, որ Google Maps-ի նկարների վրա երևում են Reaper և Predator անօդաչու թռչող սարքավորումները, սակայն այնտեղ գործարկվում է նաև RQ-170-ը:
Ինչպես հայտնում են իրանական ԶԼՄ-ները, հենց RQ-170 է դեկտեմբերի սկզբին ընկել Իրանում և հայտնաբերվել տեղի զինվորականների կողմից: Իրանի պետական ԶԼՄ-ները անցած շաբաթ ուղիղ եթերում ցույց են տվել վթարի ենթարկված RQ-170: Իրանական Fars գործակալության տվյալների համաձայն՝ այն հագեցած էր հետախուզական նորագույն համակարգերով, էլեկտրոնային կապով և ռադիոտողորոշիչներով: Այն հնարավոր է կիրառել տարատեսակ հետախուզական տվյալներ հավաքելու, մասնավորապես՝ բարձր թույլտվության լուսանկարներ ստանալու, ֆոնային ճառագայթների և օդի չափման համար:
Ամերիկյան NBC հեռուստաընկերությունը հայտնել է, որ RQ-170 կիրառվել է ԱՄՆ կենտրոնական հետախուզական վարչության շահերի շրջանակներում` Իրանի միջուկային ծրագրերի վերաբերյալ տեղեկությունների ստանալու համար:
Նշենք, որ Google-ը հրաժարվել է մեկնաբանել տեղի ունեցածը:
