ԱՄՆ նախագահ Բարաք Օբաման հարցազրույց է տվել թուրքական Hurriyet-ին, ուր նա խոսել է թուրք-ամերիկյան, իսրայելա-թուրքական և Իրանի հիմնախնդիրների մասին:
Օբաման ասել է, որ Թուրքիայի հետ Միացյալ Նահանգների հարաբերությունները շարունակում են մնալ ամուր և «կարևոր են ավելի, քան երբևէ»` չնայած ամերիկյան դիվանագիտական այն փաստաթղթերին, որոնք հրապարակվել են հայտնի կայքի կողմից: Այդ փաստաթղթերում մի շարք կտրուկ արտահայտություններ կային՝ ուղղված Անկարային, սակայն, ինչպես նշել է Օբաման` հղում անելով վերջերս Թուրքիայի վարչապետի հետ ունեցած զրույցին, երկու երկրների հարաբերությունները չեն տուժի այդ հրապարակումներից:
Աջակցություն հայտնելով թուրքական իշխանություններին Քրդական աշխատավորական կուսակցության դեմ պայքարում՝ այդուհանդերձ, ԱՄՆ նախագահը կոչ է արել թուրքական կառավարությանը քայլեր ձեռնարկել՝ բարելավելու «քրդերի հետ կապված մարդու իրավունքներն ու տնտեսական վիճակը», այդ թվում՝ քրդերենի ուսուցման արգելքը վերացնել և քրդերենով հանրային հեռարձակումներ ապահովել:
Խոսելով թուրք-իսրայելական հարաբերությունների մասին` Օբաման նշել է, որ կողմերը պետք է ամեն ինչ անեն, որպեսզի ԱՄՆ տարածաշրջանային երկու դաշնակիցները բարելավեն երկկողմ հարաբերությունները: Նա բարձր է գնահատել Թուրքիայի վարչապետ Ռեջեփ Թայիփ Էրդողանի որոշումը` ինքնաթիռներ ուղարկել Իսրայել` հրդեհաշիջման աշխատանքներին մասնակցելու համար:
Անդրադառնալով իրանական խնդրին՝ Օբաման ասել է, որ Թուրքիայի արտաքին քաղաքականության ուղղվածությունը՝ բարելավել հարաբերությունները հարևան երկրների հետ, ԱՄՆ նախագահը կարևոր է համարում: Խոսելով Իրանի նկատմամբ պատժամիջոցների կիրառման վերաբերյալ Թուրքիայի և ԱՄՆ միջև եղած տարակարծությունների մասին՝ Օբաման ասել է, որ, այդուհանդերձ, բարձր է գնահատում Իրանի կողմից միջուկային զենքի ստացման անթույլատրելիության մասին Թուրքիայի դիրքորոշումը:
Ինչ վերաբերում է ԵՄ-ին Թուրքիայի անդամակցությանը, ապա Օբաման վերահաստատել է նախկինում ԱՄՆ վարչակազմի և իր կողմից արտահայտված այն կարծիքը, թե իր երկիրն աջակցում է Թուրքիային այդ հարցում: Օբաման միաժամանակ կոչ է արել շարունակել բարեփոխումները անդամակցության գործընթացն ավարտին հասցնելու համար:
