Ադրբեջանական APA լրատվական գործակալության փոխանցմամբ, Ադրբեջանն ու Վրաստանը համաձայնեցրել են վրաց-ադրբեջանական 480 կիլոմետրանոց սահմանի 300 կիլոմետրանոց հատվածի սահմանագծումը։ Մնացել է համաձայնեցնել մնացյալ 180 կիլոմետրը, որի ուղղությամբ համապատասխան աշխատանքներ են տարվում։
Ադրբեջանական կողմը հայտնում է, որ ներկայումս իրենք այդ հարցում սպասում են Վրաստանի պատասխանին։ Դրա ստացումից հետո երկու երկրների սահմանազատման հանձնաժողովները ձեռնամուխ կլինեն իրենց բուն գործունեությանը։
Հիշեցնենք, որ այս տարվա սեպտեմբերի վերջին Վրաստանի փոխարտգործնախարար Դավիթ Ջալագանիան հայտարարել էր, որ իրենց մնացել է համաձայնեցնել վրաց-ադրբեջանական 450 կիլոմետրանոց սահմանի 160 կիլոմետրանոց հատվածը։
Գարնանը վրացական լրատվամիջոցները գրել էին, որ վրաց-ադրբեջանական սահմանին կատարվել է 69 տարածքային ուղղում, որոնցից 42-ը եղել են ի վնաս Վրաստանի, իսկ 27-ը`ի վնաս Ադրբեջանի: Այդ ամենի արդյունքում, Վրաստանի տարածքային կորուստները կազմել էին մոտ 293 հեկտար: