Թուրքական Zaman թերթի փոխանցմամբ, այսօրվանից ուժի մեջ է մտել թուրք-վրացական սահմանի հատմանն առնչվող մեղմացված ռեժիմը։ Այսուհետ թուրք-վրացական սահմանի հատման ու տվյալ երկրում շրջելու համար անհրաժեշտ չէ ոչ միայն անցագիր, այլև միջազգային անձնագիր։
Այսօրվանից սկսած՝ երկու երկրների քաղաքացիները կարող են թուրք-վրացական սահմանը հատել միջազգային չափորոշիչներին համապատասխան փաստաթղթի միջոցով։ Խոսքը նոր՝ երկլեզու ինքնության վկայականի մասին է, որն արդեն իսկ գործում է Վրաստանում։
Բացի այդ, այսօրվանից սկսած՝ երկու երկրների նավաստիներն ու օդաչուները կարող են միջպետական սահմանը հատել իրենց ծառայողական փաստաթղթերով։
Այս մասին պայմանավորվածությունը ձեռք էր բերվել այս տարվա մայիսի 31-ին՝ Սարփիում կայացած Թուրքիայի վարչապետ Էրդողանի և Վրաստանի նախագահ Սաակաշվիլիի հանդիպման ժամանակ։
Հիշեցնենք, որ Թուրքիայի ու Վրաստանի միջև անցագրային ռեժիմի վերացումը սկսել է գործել 2006 թվականի սկզբից։ Ըստ դրա՝ երկու երկրների քաղաքացիները կարող են արտասահմանյան անձնագրերով հատել միջպետական սահմանը և առանց անցագրի տվյալ երկրում գտնվել 90 օր։
