Ռուսական ВЗГЛЯД թերթի փոխանցմամբ, վրացական «Նախկին քաղբանտարկյալներ – հանուն մարդու իրավունքների պաշտպանության» իրավապաշտպան կազմակերպությունը հայտարարել է, որ 2011 թվականին քաղբանտարկյալների ցուցանիշով Վրաստանը հայտնվել է համաշխարհային առաջատարների թվում։
Կազմակերպությունը նշել է. «2011 թվականին Վրաստանում մարդկանց դատապարտման քանակը հասավ այնպիսի մակարդակի, որ 100,000 բնակչին բաժին ընկնող մեղադրյալների ու դատապարտվածների ցուցանիշով Վրաստանն աշխարհում զբաղեցրել է առաջին տեղը:
2011 թվականի մայիսի 26-ին վրացական իշխանությունները երկրի պատմության մեջ առաջին ագնամ հատուկ դաժանությամբ ցրեցին ընդդիմության ցույցը։ Ցույցը ցրելիս զոհվեց 4 մարդ, մի քանի հարյուրը ստացան տարբեր ծանրության մարմնական վնասվածքներ, շատերը ենթարկվեցին վարչական պատիժների, մի քանի տասնյակ ցուցարարներ դատապարտվեցին տարբեր ժամկետով ազատազրկման։
2011 թվականին Վրաստանում գրանցվեց քաղբանտարկյալների առկայության ամենաբարձր ցուցանիշը՝ համեմատած նախորդ տարիների հետ։ Բացի այդ, այս տարի Վրաստանում բազմիցս խախտվել են Աբխազիայից ու Հարավային Օսիայից հարկադիր վերաբնակների իրավունքները։
Այս տարի Վրաստանում աճել են կոմունալ ծառայությունների և սպառողական շուկայի գները, ավելացել է գործազուրկների քանակը։ 3.5 միլիոն բնակչություն ունեցող Վրաստանում ավելի քան 1 միլիոն մարդ գտնվում է աղքատության շեմին։
2011 թվականին վրացական իշխանությունները շարունակել են իրականացնել օրենսդրական այնպիսի փոփոխություններ, որոնք ուղղված են քաղաքացիների իրավունքների սահմանափակմանը և ընդհակառակը՝ իշխանությունների իրավունքների աննախադեպ մեծացմանը»։
