Այսօր Թբիլիսիում տեղի ունեցավ Ռեգիոն հետազոտական կենտրոնի կազմակերպած ծրագրերի ամփոփմանը նվիրված կոնֆերանս-քննարկում: Կոնֆերանսին մասնակցում էին լրագրողներ Հայաստանից և Ադրբեջանից, ծրագրերի ղեկավարներ` Ռեգիոն հետազոտական կենտրոնի ղեկավար Լաուրա Բաղդասարյանը` Հայաստան, և ադրբեջանցի քաղաքագետ, Խաղաղության և ժողովրդավարության ինստիտուտի` Ղարաբաղի հարցերով փորձագետ Արիֆ Յունուսովը` Ադրբեջան, ինչպես նաև Հարավային և Հյուսիսային Կովկասի կոնֆլիկտների Մեծ Բրիտանիայի արտգործնախարարության խորհրդատու Քլեար Դելեսարը: Նա իր խոսքում նշեց, որ կոնֆլիկտների կարգավորման գործում հասարակության և լրագրողների մասնակցությունը չափազանց կարևոր է:
«Մենք հետաքրքրված ենք այս տարածաշրջանում կոնֆլիկտների լուծմամբ և աշխատում ենք նպաստել դրան նմանատիպ ծրագրերն աջակցելու միջոցով»,- նկատեց Դելեսարը:
Տեղեկացնենք, որ «Այլընտրանքային ինֆորմացիա հայ-ադրբեջանական երկխոսության վերաբերյալ» ծրագիրը ֆինանսավորվում է Հայաստանում և Ադրբեջանում Մեծ Բրիտանիայի դեսպանատների կողմից, իրականացվում է Խաղաղության և ժողովրդավարության ինստիտուտի հետ համատեղ:
Լաուրա Բաղդասարյանը տեղեկացրեց, որ այս ծրագրի նպատակն այն է, որ Հայաստանի և Ադրբեջանի լրագրողներն ունենան այլընտրանքային ինֆորմացիայի աղբյուր, քանզի տեղեկատվական պատերազմի մեջ գտնվող հասարակությունների համար դժվար է միմյանցից տեղեկություն ստանալ առաջին ձեռքից, լսել կարծիքներ, որոնք չեն հնչել. «Մեր նպատակն այն է, որ հասարակությունը լսի հայ ու ադրբեջանցի փորձագետների կարծիքները միևնույն թեմայի վերաբերյալ, իսկ թեմաները շատ տարբեր են եղել` սոցիալական, տնտեսական, երիտասարդական խնդիրներ»:
Արիֆ Յունուսովն էլ նշեց, որ հաճախ լինում էին խնդիրներ երկու կողմի կարծիքը տպագրելու հարցում, քանզի որոշ դեպքերում ԶԼՄ-ները չէին ցանկանում հրապարակել հայկական կողմի կարծիքը: Ըստ փորձագետի՝ իհարկե այստեղ մեծ դեր ունի առկա հակամարտությունը, սակայն փաստն այն է, որ թե Հայասատանի, թե Ադրբեջանի հասարակությանը հետաքրքիր են տարբեր թեմաների շուրջ երկու կողմի կարծիքներն էլ: Յունուսովի խոսքերով, լրագրողները մեծ դեր ունեն հակամարտությունների կարգավորման գործում, քանզի վերջիններս կարող են և հարթել պատերազմները, և թեժացնել այն:
«Հետաքրքիր է, թե ինչպես են արձագանքում այս ծրագրերին, քանզի շատ են եղել դեպքեր, երբ փորձագետը իմանալով, որ իր հարցազրույցը տպագրվելու է նաև հակառակ կողմում՝ կամ հրաժարվել է, կամ էլ անկեղծ չի եղել, ինչը վկայում է, որ մարդը վախենում է, թե ինչպես այնուհետև կարձագանքեն իր այդ քայլին: Բայց փաստն այն է, որ երկու կողմի համար էլ հետաքրքիր են այդ այլընտրանքային կարծիքները: Մենք իրականացնելով այս ծրագրերը՝ նպատակ ունենք հաղթահարել այն վախը, որը կա, ու թեև բանակցային գործընթացը ձգձգվել է, բայց այդ վախը հաղթահարել պետք է»,- կարծիք հայտնեց Յունուսովը:
