«168 ժամ»-ի տեղեկություններով՝ ՀՀԿ-ում անկումային տրամադրություններ են հասունացել ԱԺ նախագահի և փոխնախագահի պաշտոններում Սամվել Նիկոյանի և Էդուարդ Շարմազանովի ընտրվելու հետ կապված։
«Հայտնի է, որ ԱԺ նախագահ դառնալու ցանկություն ուներ նաև ՀՀԿ խմբակցության ղեկավար Գալուստ Սահակյանը։ ԱԺ-ում խոսում են, որ նա նեղ շրջանակներում հայտարարել է՝ եթե ինքը չդառնա ԱԺ նախագահ, Տիգրան Թորոսյանի նման, հնարավոր է, դուրս գա ՀՀԿ-ից։ Իսկ ԱԺ նախագահ դառնալու համար նրան փորձում էր առաջ մղել նախկին խոսնակ Հովիկ Աբրահամյանը։ Ի դեպ, ասում են, բավականին վատ տրամադրություն ունի նաև Հ. Աբրահամյանը, ով չկարողացավ նշանակել ոչ միայն իրեն փոխարինողի, այլ՝ նույնիսկ ՀՀԿ խմբակցության ղեկավարին։
Հ. Աբրահամյանը և Գ. Սահակյանն այս դեպքում փորձել են առաջադրել պատգամավոր Հովհաննես Սահակյանի թեկնածությունը։ Բայց որոշ տեղեկությունների համաձայն` նախագահ Սերժ Սարգսյանը վերջինիս չի ընդունել, որովհետև Սահակյանին առաջադրել են իր վստահությունը չվայելող Հ. Աբրահամյանն ու Գ. Սահակյանը։ ԱԺ-ում արդեն խոսում են, որ հաջորդ խորհրդարանում չի լինի նաև այն պատգամավորների մեծ մասը, ովքեր Հ. Աբրահամյանի ազդեցության տակ են։