Հայաստանում մարդու իրավունքները տարեցտարի ետընթաց են ապրում: «Առաջին լրատվական»-ի հետ զրույցում նման տեսակետ հայտնեց իրավապաշտպան Հովիկ Արսենյանը`խոսելով Հայաստանում մարդու իրավունքների պաշտպանվածության շուրջ: Ըստ նրա` քրեական դատավարության օրենսդրության մեջ այդպիսի հսկայական նորամուծություններով և փոփոխություններով չէ, որ օրինականություն պետք է հաստատել կամ հանցավորության դեմ պայքար ծավալել:
«Դրա անվան տակ տեղի են ունենում երևույթներ. մարդկանց իրավունքների ու ազատությունների ոտնահարում, որը կարծես թե կանոն է դարձել: Հայտնի է, որ յուրաքանչյուր քրեական գործով տեղեկանքներ են պահանջվում նախագահականից, սա շատ զարմանալի է»,- նշեց իրավապաշտպանը`հավելելով, որ ՀՀ Սահմանադրության մեջ նման կարգ գոյություն չունի:
Անդրադառնալով օրենքներին`Հ. Արսենյանն ասաց, որ մեր իրականության մեջ չի պահպանվել օրենքը, օրինականությունը, որի արդյունքում, բնականաբար, ոտնահարվում են մարդու իրավունքները: «Ասել, թե այս կամ այն գերատեսչության կողմից որոշակիություն կա մարդու իրավունքների ոլորտում, սխալ է»,- մեկնաբանեց Հ. Արսենյանը`ընդգծելով, որ չկա նաև օրենքի գերակայություն: Նրա համոզմամբ` կան երկակի ստանդարտներ՝ օրենքի պարզաբանման, մեկնաբանման, կիրառման առումով, որը պետք է շտկվի: