«Լուրջ հանդիպումների և կապերի մեջ ենք քաղաքական մի շարք ուժերի հետ»,- «Առաջին լրատվական»-ի հետ զրույցում ասաց «Ազգային ժողովրդավարների դաշինքի» ղեկավար Արշակ Սադոյանը՝ պատասխանելով հարցին, թե ի՞նչ փուլում է դաշինքի վերամիավորման գործընթացը:
«Փորձում ենք հստակեցնել՝ ի՞նչ մեխանիզմներով պետք է մասնակցենք, այդքան կարևոր չէ նույնիսկ ընտրություններին, որքան ազգային ժողովրդավարության սկզբունքները հանրությանը ներկայացնելու գործընթացին»,- նկատեց նա:
Հարցին՝ բացի դաշինքի մաս կազմող նախկին ուժերից, քաղաքական այլ կուսակցությունների հետ և՞ս բանակցությունների մեջ են, Արշակ Սադոյանը նկատեց. «Բանակցում ենք բոլոր այն ուժերի հետ, որոնք ընդունում են մեր կողմից առաջադրված գաղափարական 6-7 սկզբունքները: Այդ գաղափարական սկզբունքների միջոցով էլ փորձելու ենք մի դաշինքային գործընթաց սկսել, որպեսզի այդ գաղափարների կրողների թիվն ավելանա»:
Դեռևս չե՞ք որոշել՝ մասնակցելու եք առաջիկա խորհրդարանական ընտրություններին՝ հարցին էլ Սադոյանը պատասխանեց, որ դա կախված կլինի վերոնշյալ՝ բանակցային գործընթացի արդյունքներից: