Իհարկե, կներեք, ընկեր Թովմասյան` տհաճ հարցի համար, բայց երեկ պատահաբար նկատեցինք, որ Հայաստանի գլխավոր կոմունիստ, Կոմունիստական կուսակցության Կենտրոնական կոմիտեի առաջին քարտուղար Ռուբեն Թովմասյանը քաղաքացիական երկու գործերով հանդես է գալիս որպես իրավահարաբերության սուբյեկտ` կողմ, մի դեպքում` հայցվոր, մյուս դեպքում` պատասխանող:
Առաջին գործով, Հայաստանի Կոմունիստական կուսակցության Կենտրոնական կոմիտեն` ի դեմս առաջին քարտուղար Ռուբեն Թովմասյանի, դիմել է Կենտրոն և Նորք-Մարաշ վարչական շրջանների ընդհանուր իրավասության դատարան` ընդդեմ Պետական գույքի գույքագրման և գնահատման գործակալություն ՊՈԱԿ-ի և պահանջում է լուծել պայմանագիրը: Թե ինչ պայմանագիր են ուզում լուծել` կտեղեկանաք ներքևում ներկայացված զրույցից: Մինչ այդ նշենք, որ սույն գործով դատավորը Սամվել Թադևոսյանն է:
Իսկ երկրորդ գործով ՀՀ ԿԱ պետական գույքի կառավարման վարչությունն է դիմել դատարան` ընդդեմ Կոմունիստական կուսակցության և պահանջում է կոմունիստներին վտարել զբաղեցրած տարածքից: Փաստորեն, այստեղ էլ Ռուբեն Թովմասյանը հանդես է գալիս որպես պատասխանող: Երկու դեպքում էլ որպես իրավասուբյեկտի հասցե նշված է ք. Երևան, Զաքյան 10 հասցեն: Սույն գործով նախագահող դատավորը Արայիկ Մելքումյանն է:
Այս երկու դատական գործերի ծանուցումներն ուսումնասիրելիս երկու ուշագրավ հանգամանք նկատեցինք: Նախ` երկու գործով էլ դատական նիստերը նշանակված էին դեկտեմբերի 8-ին, ժամը 10.30-ին: Երկրորդ` նախ կոմունիստներն էին ս.թ. հունիսի 29-ին հայցով մտել դատարան` պայմանագիրը չեղյալ հայտարարելու պահանջով, իսկ դրանից 12 օր անց` «կոնտրատակա» հայցով պետգույքի կառավարման վարչությունն էր հայց ներկայացրել: Եվ քանի որ չգիտեինք, թե կոնկրետ ինչ պայմանագիր էին ուզում լուծել կոմունիստները, մեզ առաջին պահին թվաց, թե կոմունիստները տարածքը զբաղեցնելու վերաբերյալ պայմանագիրն են ցանկանում լուծարել և օրհասական այս պահին անժամանակ հեռանալ քաղաքական դաշտից:
Սակայն երբ զանգահարեցինք առաջին քարտուղար Ռուբեն Թովմասյանին` պարզվեց, որ ամենևին էլ այդպես չէ. նա մեզնից լուրջ քաղաքական հարցեր էր ակնկալում, իսկ մենք միամտորեն հարցրինք, թե չե՞ն ուզում այլևս տարածքը զբաղեցնել, որ դիմել են` պայմանագիրը լուծելու: Պարոն Թովմասյանն էլ պատասխանեց. «Տարածքը զբաղեցնելու մասին չի խոսքը: Տարածքը սպասարկելու մասին է խոսքը: Մամուլի տանը»: Այսինքն` լա՞վ չեն սպասարկում: «Այո, լավ չեն սպասարկում, և դիմել ենք, որ պայմանագիրը (սպասարկման.- 1in.am) չեղյալ հայտարարվի»: Եվ քանի որ տեղյակ էինք նաև տարածքից վտարելու հայցի մասին ու կարծում էինք, որ առաջին քարտուղարն էլ պետք է տեղյակ լինի, հետաքրքրվեցինք, թե ուրիշ տարածք վերցնելո՞ւ են` կուսակցական գործունեությունը շարունակելու համար: Պարոն Թովմասյանը սկզբում շատ հանգիստ տեղեկացրեց. «Մենք ունենք տարածք, մենք նոր տարածքի կարիք չունենք: Բայց ինչի՞ է դա ձեզ հետաքրքրում»:
Երբ ասացինք, որ դատարանում նաև տարածքից վտարելու պահանջ կա, և մենք ուզում ենք հասկանալ` ի՞նչ հիմքով են ուզում կոմունիստներին տարածքից վտարել, առաջին քարտուղարը, հավանաբար, կրկին չհասկանալով, թե ինչի մասին է խոսքը` կրկնեց. «Մենք դիմել ենք սպասարկման վարձի պայմանագիրը չեղյալ հայտարարելու… Չեն սպասարկում` դրա համար»: Այսինքն` չե՞ք տեղափոխվելու: «Ոչ մի տեղ, մենք մեր նստատեղն ունենք, ինչ տեղափոխվելու հարց ա դա…»: Որտե՞ղ է Ձեր տարածքը. հետաքրքվեցինք` հասկանալու համար, թե կոնկրետ որ հասցեից են ուզում վտարել կոմունիստներին` Զաքյանի՞ց, թե՞ մամուլի տան տարածքից: Զրուցակիցս երևի մի քիչ վիրավորվեց իմ հարցից և պատասխանեց. «Մինչև հիմա դուք չգիտե՞ք մեր նստատեղը որտեղ ա»: Բացատրեցի, որ ես հիմնականում իրավական հարցերով եմ զբաղվում, և ոչ թե քաղաքական: Այդուհանդերձ, պնդեցի հարցս` Պետգույքի կառավարման վարչությունն ինչո՞ւ է դիմել դատարան` տարածքից վտարելու պահանջով… «Ես Ձեզ ասում եմ` էդպիսի գործ չկա, դուք պնդում եք: Որ խորացել էիք, մինչև վերջ խորանայիք, հիմա դուրս ա գալիս` դուք ինձ քննում եք… Ես ձեզ ասում եմ` էդպիսի գործ չկա… Ինձ թվում էր` քաղաքական հարցեր պետք է տայիք»,- տողերիս հեղինակին հանդիմանեց պարոն Թովմասյանը:
Այնուամենայնիվ, նախկին հոկտեմբերիկս, պիոներս, բայց ոչ կոմունիստս համարձակվում է Հայաստանի Կոմունիստական կուսակցության Կենտրոնական կոմիտեի առաջին քարտուղարին հորդորել` ընկեր Թովմասյան, դեկտեմբերի 22-ին, ժամը 17.00-ին անպայման գնացեք Կենտրոն և Նորք-Մարաշ վարչական շրջանների ընդհանուր իրավասության դատարան. 13-րդ դահլիճում վտարման հարցով որոշում կամ վճիռ է հրապարակվելու: Գոնե կիմանաք ու կհասկանաք` կոմունիստներին միայն գործունեության տարածքի՞ց են ուզում հեռացնել, թե՞ սպասվող քաղաքական ընտրապայքարից:
«Ժամանակ»