Լրագրողների պաշտպանության կոմիտեի անցկացրած հարցումների արդյունքում պարզվել է, որ ըստ դեկտեմբերի 1-ի տվյալների աշխարհում 179 բանտարկված լրագրող կա, ինչը 34-ով ավելի է, քան 2010 թվականին: Լրագրողների պաշտպանության կոմիտեն հայտնում է, որ սա 15 տարիների ընթացքում ամենամեծ թիվն է:
Բանտարկված լրագրողների թվի մեծացումը հիմնականում կապված է Մերձավոր Արևելքում և Աֆրիկայում տարվա ընթացքում ծագած ապստամբությունների հետ: Հետաքրքիր է, որ Հարավային և Հյուսիսային Ամերիկայում իր աշխատանքի պատճառով ոչ մի լրագրող չի բանտարկվել:
The Cutline-ը գրում է, որ ներկայումս Իրանում կա 42 բանտարկված լրագրող, որը ամենաբարձր թիվն է՝ այլ երկրների համեմատ: Իրանում բանտարկությունից ազատված լրագրողներն ասում են, որ իրենց վրա անընդհատ ճնշում է գործադրվում, որ լռեն, իրենց գործընկերների մասին տեղեկատվություն փոխանցեն և, ինչպես լրագրողներից մեկն էր ասել, Իրանի նախագահ Մահմուդ Ահմադինեժադի կառավարության պատճառով «ապրեն մշտական վախի ու ահաբեկման պայմաններում»:
