Մարգար Օհանյանը վճարել է պետությանը հասցված վնասը, սակայն իրեն մեղավոր չի ճանաչում առաջադրված մեղադրանքներում: Այս մասին «Առաջին լրատվական»-ին տեղեկացրեց Մարգար Օհանյանի փաստաբան Մկրտիչ Վասակյանը`հավելելով, որ գումարը վճարվել է, քանի որ յուրացումները կատարվել են իր ղեկավարության օրոք:
Փաստաբանի հավաստմամբ` այս քայլն արվել է Մարգար Օհանյանի պատվի և արժանապատվության համար, քանի որ նա արդեն երեսուն տարի է, ինչ իրավապահ մարմիններում է:
«Գումարը հավաքվել է ընկերների, հարազատների կողմից»,- ասաց փաստաբանը՝ հավելելով, որ եթե հաջողվի Մարգար Օհանյանին արդարացնել, ապա այդ գումարները ետ կվերադարձվեն: Մ. Վասակյանը նաև ասաց, որ շուտով Մարգար Օհանյանի գործը կուղարկվի դատարան, քանի որ քրեական գործի նախաքննությունը մոտենում է ավարտին: Հարցին՝ պետությանը հասցված վնասի փոխհատուցումից հետո կա՞ն համաձայնության գալու միտումներ, պատասխանեց`ոչ:
Հիշեցնենք, որ Մարգար Օհանյանը մեղադրվում է Քրեական օրենսգրքի երկու հոդվածներով` պաշտոնական դիրքը չարաշահելու և առանձնապես խոշոր չափի յուրացումներ կատարելու համար: Նա մեղադրվում է մարզային ոստիկանությանը տրամադրված խոշոր չափի բենզինը յուրացնելու մեջ: