France-Presse գործակալության փոխանցմամբ, իրանական իշխանությունները շրջափակել են (ինտերնետում) Թեհրանում ԱՄՆ նորաստեղծ «վիրտուալ դեսպանատան» մուտքը։
Երեկ ԱՄՆ Պետդեպարտամենտը պաշտոնապես հայտարարել էր Թեհրանում իր «ցանցային դեսպանատան» բացման մասին։ Անգլերենով այն հասանելի է iran.usembassy.gov հասցեով, իսկ պարսկերենով՝ persian.iran.usembassy.gov հասցեով։
Դեսպանատան կայքն ունի նույնպիսի բաժիններ, ինչպես որ այլ երկրներում ԱՄՆ դեսպանատների կայքերը։ ԱՄՆ Պետդեպարտամենտը հույս էր հայտնել, որ «կայքը» և նրա հետ կապված սոցցանցերը կվերածվեն կամրջի, որը կնպաստի ԱՄՆ-ի ու Իրանի միջև փոխըմբռնման բարելավմանը։
Մինչդեռ այսօր Իրանում այն անձինք, ովքեր փորձել են մուտք գործել ամերիկյան «վիրտուալ դեսպանատան» կայք, նրանց առջև բացվել է պարսկերենով գրված հետևյալ նախադասությունը. «Համակարգչային հանցագործությունների օրենքի համաձայն՝ այս կայքից օգտվելն անհնար է»։
Իրանի խորհրդարանի ազգային անվտանգության և արտաքին քաղաքականության հանձնաժողովի նախագահ Ալաեդդին Բորուջերդին հայտարարել է, որ Թեհրանում ԱՄՆ «վիրտուալ դեսպանատան» բացումը նոր խաբկանք է, և Իրանի ժողովուրդը չի տրվի դրան. «ԱՄՆ-ի այդ նոր ցանցային նախագիծը ձախողված փորձ է՝ իրանական ժողովրդին համոզելու համար, թե Վաշինգտոնը պատրաստ է երկխոսության մեջ մտնել Թեհրանի հետ»։
Հիշեցնենք, որ ներկայումս Իրանի ու ԱՄՆ-ի միջև գոյություն չունեն դիվանագիտական հարաբերություններ, և Իրանում ԱՄՆ շահերը ներկայացնում է Շվեյցարիան։
