Երևանի քաղաքապետ Տարոն Մարգարյանը հանդիպել է ՀՀ-ում Գերմանիայի Դաշնային Հանրապետության արտակարգ և լիազոր դեսպան Հանս-Յոխեն Շմիդտի հետ:
Ինչպես «Առաջին լրատվական»-ին հայտնում են Երևանի քաղաքապետարանի տեղեկատվության և
հասարակայնության հետ կապերի վարչությունից, հանդիպմանը մասնակցել են նաև Գերմանական միջազգային համագործակցության ընկերության հայաստանյան գրասենյակի ու Վերականգնման վարկերի բանկի հայաստանյան ծրագրերի ղեկավարները:
Հ.-Յ. Շմիդթը կարևորել է գերմանական քաղաքների և Երևանի միջև տեղական ինքնակառաման համակարգում գործընկերային հարաբերությունների ընդլայնման ու զարգացման հեռանկարները։
Քաղաքապետը բարձր է գնահատել հայ-գերմանական հարաբերությունների ներկա մակարդակը, նշելով, որ Երևանի քաղաքապետարանը շահագրգռված է քաղաքային գործընկերային ձևաչափով համագործակցության ակտիվացման և գերմանական քաղաքների հետ երկկողմ հարաբերությունների զարգացման գործում:
«Մենք պատրաստ ենք ակտիվացնել համագործակցությունը`սերտ մասնակցություն ակնկալելով քաղաքային տնտեսության կառավարման բոլոր ուղղություններով փորձի փոխանակման, մասնագետների վերապատրաստման, խորհրդատվական ծառայությունների մատուցման, ինչպես նաև համատեղ և փոխադարձ հետաքրքրություն ներկայացնող բիզնես ծրագրերում»,- նշել է Տ. Մարգարյանը:
Դեսպանն էլ իր հերթին նշել է, որ Հայաստանում ներկայացված գերմանական կազմակերպությունները մեծ փորձ ունեն քաղաքային տնտեսության ենթակառուցվածքների համակարգման ոլորտում և պատրաստակամություն է հայտնել իր առաքելոթյան շրջանակում նպաստել փոխադարձ կապերի ամրապնդմանն ու գերմանական կողմի մասնակցությանն այդ ծրագրերում:
Տ. Մարգարյանը նշել է, որ բոլոր այն ծրագրերը, որոնք Երևանի քաղաքապետարանը ձեռնարկել է Վերականգնման վարկերի բանկի հետ, կունենան իրենց շարունակությունը և հույս է հայտնել, որ կգտնեն նաև համագործակցության այլ եզրեր:
