Грузия Online-ի փոխանցմամբ՝ Վրաստանի փոխվարչապետ, Եվրոպական ու եվրաատլանտյան հարցերով պետնախարար Գեորգի Բարամիձեն EurActiv-ին տված հարցազրույցի ժամանակ անդրադարձել է Վրաստանի եվրաինտեգրմանն ու ռուս-վրացական հարաբերություններին.
«Իրատեսական չէ այն, որ Վրաստանը 3-5 տարում կինտեգրվի ԵՄ-ին։ Մենք չենք խոսում միջին հեռանկարում ԵՄ-ին անդամակցելու մասին։ Վրաստանը գնալով ավելի և ավելի է ինտեգրվում ԵՄ-ին, ինչի պատճառով էլ Ռուսաստանի համար ավելի և ավելի դժվար է դառնում ապօրինի օկուպացիայի պահպանումը։
Երբ Վրաստանն անդամակցի ՆԱՏՕ-ին, Ռուսաստանը կկորցնի այդ օկուպացիան պահպանելու խթանը։ Նա կհասկանա, որ նմանատիպ մեթոդներով անհնար կլինի Վրաստանի հետ պայմանավորվածությունների հասնելը։ Ես կարծում եմ, որ ՆԱՏՕ-ին Վրաստանի անդամակցության դեպքում Ռուսաստանն առավել կառուցողական դիրքորոշում կորդեգրի Վրաստանի հանդեպ։
Մենք դրան արդեն իսկ ականատես ենք եղել Լեհաստանի և Մերձբալթյան երկրների պարագայում։ Այսօր Վրաստանը ՆԱՏՕ-ին առավել մոտ է կանգնած, քան 3 տարի առաջ (2008)։ Մենք ունենք բարեփոխումների մեր ազգային ամենամյա ծրագիրը։ Սակայն ԵՄ-ին ինտեգրվելը պահանջում է առավել զգալի կառուցվածքային փոփոխություններ, ինչը մասնավորապես վերաբերում է երկրի տնտեսությանը։ Վրաստանը պետք է հասնի ԵՄ-ի իրավական չափորոշիչներին, ինչն ավելի տևական գործընթաց է»։
Բարամիձեն հավելել է, որ ԵՄ-ի հետ Շվեյցարիայի ու Նորվեգիայի ունեցած հարաբերությունները կարող են հիմք ծառայել Վրաստան-ԵՄ կապերի համար։
Հիշեցնենք, որ երկու օր առաջ ԵՄ-ը որոշում է ընդունել ազատ առևտրային գոտու ձևավորման մասին բանակցություններ սկսել Վրաստանի հետ։
