Խաղողի և խնձորի հյութի մեջ մկնդեղի հայտնաբերման հետ մեկտեղ, նոր հետազոտությունը ցույց է տվել, որ բրինձը ևս կարող է մեծ քանակությամբ մկնդեղի աղբյուր լինել։
Սա կարող է շատ վտանգավոր լինել հղիության ընթացքում, քանի որ մկնդեղը կարող է վնասել զարգացող երեխային:
CBSNews-ը գրում է, որ հետազոտության համար գիտնականները չափել են մկնդեղի մակարդակը 229 հղի կանանց մեզի մեջ՝ Նյու Հեմփշիրում, որտեղ բնակչության 40 տոկոսը ջուրը ստանում է ջրամբարներից: Ջրամբարների ջուրը միշտ մկնդեղի ավելի բարձր մակարդակ ունի, քան քաղաքային համակարգինը, որը համապատասխանում է ընդունված չափանիշներին:
Հետազոտողները ստուգել են, թե որքան է մկնդեղի մակարդակը կանանց օգտագործած ջրում, և նաև խնդրել էին կանանց գրել, թե ինչ սնունդ են օգտագործել անալիզից երեք օր առաջ:
Անգամ ջրում մկնդեղի մակարդակը հաշվի առնելուց հետո, հետազոտողները պարզել են, որ այն կանայք, ովքեր այդ ընթացքում բրինձ են կերել, անօրգանական մկնդեղի ավելի բարձր մակարդակ ունեն իրենց մեզի մեջ, քան նրանք, ովքեր բրինձ չեն կերել:
ԱՄՆ-ի Բրնձի ֆեդերացիան իր հայտարարության մեջ ասել է, որ նման համեմատությունը սխալ է, քանի որ հաշվի չի առնվում այն փաստը, որ ջրում մկնդեղն ամբողջովին անօրգանական է, իսկ բրնձի մեջ հայտնաբերված մկնդեղի մեծ մասն օրգանական է, որը վնասակար չէ մարդու առողջության համար:
