Համադրելով ԱՄՆ պետքարտուղար Հիլարի Քլինթոնի և ԵԱՀԿ գործող նախագահ Աուդրոնյուս Աժուբալիսի այն հայտարարությունները, որ ղարաբաղյան հակամարտությունը կարող է կարգավորվել միայն բանակցային ճանապարհով, և որ անհրաժեշտ է ակտիվացնել ԼՂ հակամարտության գոտում գրանցվող միջադեպերի շուրջ հետաքննություններ անցկացնելու մեխանիզմը, համոզվում ենք, որ միջազգային հանրությունը հետամուտ է ղարաբաղյան հակամարտության խաղաղ կարգավորմանը: «Առաջին լրատվական»-ի հետ զրույցում նման տեսակետ հայտնեց ԱԺ ՀՀԿ-ական պատգամավոր Հովհաննես Սահակյանը:
«Իհարկե, ղարաբաղա-ադրբեջանական սահմանին դիպուկահարների հետ կապված լուրջ աշխատանք պետք է կատարվի, որպեսզի խաղաղ պայմաններում, մանավանդ գարնանացանի ժամանակ նրանց կրակոցներից մարդիկ չզոհվեն: Դրա համար անհրաժեշտ անվտանգություն է պետք ապահովել»,- նկատեց խորհրդարանականը:
Նրա խոսքով, «մենք հոգնել ենք Ադրբեջանին մեսիջներ ուղարկելուց»: «Ճիշտ ժամանակն է, որպեսզի այդ մեսիջները կյանքի կոչվեն, և միջազգային հանրությունն Ադրբեջանին հարկադրաբար ստիպի կյանքի կոչել դրանք: Աշխարհը գիտի, որ Հայաստանը կատարել է իր վրա դրված պարտականությունները»,- նշեց Հովհաննես Սահակյանը:
