«Մարդկային զարգացման միջազգային կենտրոն» ՀԿ-ն, միանալով «Ակտիվության 16-օրյակ ընդդեմ գենդերային բռնության» քարոզարշավին, հանդես է գալիս նոր Ֆլեշմոբով:
Ֆլեշմոբը կանցկացվի դեկտեմբերի 7-ին` ժամը 14:00-14:30-ը Հյուսիսային պողոտա-Աբովյան փողոցների հատման մասում:
Այդ օրը ֆլեշմոբի մասնակիցներն իրենց հետ կվերցնեն 200 փուչիկ, Հյուսիսային պողոտայից դեպի Թումանյան փողոց տանող հրապարակում կկապեն խորհրդանշական երկու ժապավեն, որոնց տակ գրված կլինեն հետևյալ հարցրերը «ի՞նչ սեռի և քանի՞ երեխա ունեք» և «ի՞նչ սեռի և քանի՞ երեխա կցանկանաք ունենալ»:
Առաջին ժապավենի վրա անցորդները, կախված նրանից, թե քանի երեխա ունեն և ինչ սեռի, կկապեն նույն քանակությամբ և գույնի փուչիկներ՝ վարդագույն փուչիկներ՝ աղջիկների համար և կապույտ՝ տղաների:
Մյուս ժապավենից կկապվեն այն քանակությամբ և գույնի փուչիկներ՝ կախված այն հանգամանքից, թե քանի և ինչ սեռի երեխա են ցանկանում ունենալ անցորդները:
Վերջում ժապավենների վրա ամրացված փուչիկները բաց կթողնվեն երկինք:
Ֆլեշմոբին կմասնակցեն ՄԶՄԿ աշխատակիցները, նաև պատահական անցորդներ:
Միջոցառման ընթացքում անցորդ տղամարդկանց կրծքին կամրացվեն խորհրդանշական «սպիտակ ժապավեններ»:
Սա միջազգային հանրության կողմից ընդունված գործողություն է, որով տղամարդիկ բարձրաձայնում են կանանց նկատմամբ բռնությանն իրենց դեմ լինելու մասին:
Միջոցառման ողջ ընթացքում պաստառների միջոցով կներկայացվեն Հայաստանում ծնունդների սեռային կազմի խիստ շեղման վերաբերյալ հետևյալ կոչերը` «Մի՛ պլանավորիր սեռը, պլանավորի՛ր երեխաների քանակը», «Ես կարող եմ և՛ հայրենիքը պաշտպանել, և՛ հայրենիքի պաշտպան ծնել»:
