Մարդիկ հոգնում են անընդհատ նույն կուսակցության իշխանության ներքո ապրելուց. այդպես էր նաև Ռուսաստանում, ինչի վկայությունն էլ դարձավ իշխող «Եդինայա Ռոսիա» կուսակցության՝ այս խորհրդարանական ընտրություններին զգալիորեն քիչ քվեներ ստանալու հանգամանքը: Այս մասին «Առաջին լրատվական»-ի հետ զրույցում ասաց Հայաստանի Լիբերալ կուսակցության ղեկավար, ՀԱԿ ներկայացուցիչ Հովհաննես Հովհաննիսյանը:
«Ռուսները հոգնել են միակուսակցական համակարգում ապրելուց, քանի որ այդ կուսակցությունը մի տեսակ նմանվել էր Կոմկուսին: Եթե զուգահեռներ տանենք Հայաստանի հետ, ապա հայաստանյան հասարակությունը ևս հոգնել է ՀՀԿ-ից: Սակայն ՀՀԿ-ին շատ ավելի վատ ճակատագիր է սպասում, որովհետև կեղծելով ընտրությունները՝ ՀՀԿ-ն որերորդ անգամ դառնում է քաղաքական մեծամասնություն, բայց հասարակությունը դրանից ոչինչ չի շահում:
2008-ին Սերժ Սարգսյանը մեծ խոստումներ էր տալիս, բայց 4 տարի անց Հայաստանում խիստ աղքատների թիվն ավելացել է 270 հազարով: Սրանով էլ կարելի է գնահատական տալ ՀՀԿ-ին՝ որպես իշխող կուսակցություն: Այստեղ էլ մարդիկ հոգնել են ՀՀԿ-ից ու ՀՀԿ-ի մարդկանցից. սա շատ ակնհայտ է»,- նկատեց Հովհաննես Հովհաննիսյանը: