Այսօր ԱԺ «Ժառանգություն» խմբակցության պատգամավոր Լարիսա Ալավերդյանը օրենքներից մեկի նախագծի քննարկման ժամանակ կոչ արեց ԱԺ խումբ-խմբակցություններին հանդես գալ ԱԺ արտահերթ նիստ հրավիրելու առաջարկությամբ` քննարկելու համար ՀՌԱՀ-ի վերջին որոշումը, որով հերթական անգամ «Ա1+»-ը դուրս թողնվեց եթերից: Լ. Ալավերդյանի ասելով` ՀՌԱՀ նախագահ Գրիգոր Ամալյանը, խախտելով անմեղության կանխավարկածը, մեղադրել է «Ա1+»-ին փաստաթղթեր կեղծելու մեջ, այն դեպքում, երբ կեղծիքի փաստ, որպես այդպիսին, դատարանի կողմից չկա հաստատված: Բացի այդ, ըստ պատգամավորի, եթե «Ա1+»-ի ներկայացրած փաստաթղթերի հետ կապված խնդիրներ էին առաջացել, հանձնաժողովը կարող էր առաջարկել «Ա1+»-ին համապատասխան պարզաբանումներ տալ կամ փոփոխություններ անել փաստաթղթերում: Լ. Ալավերդյանի խոսքով, ՀՌԱՀ-ի 4 անդամները, որոնք նշանակվել են ԱԺ կողմից և 0 են գնահատել «Ա1+»-ի մրցութային փաթեթը, պետք է բացատրություններ տան ԱԺ-ում իրենց այդ գնահատականի համար: