Պաղեստինի իսլամիստական «ՀԱՄԱՍ» շարժման ակտիվիստների մեծ մասը լքել է Սիրիայի տարածքը, որտեղ տեղակայված է շարժման քաղբյուրոն: Այս մասին հաղորդում է իսրայելական Haaretz թերթը՝ վկայակոչելով Պաղեստինի վարչակազմում իր սեփական աղբյուրներին:
Պարբերականի տվյալներով՝ Սիրիան հիմնականում լքում են շարժման այն ակտիվիստները, ովքեր պատասխանատու են շարժման զինված թևի գործունեության ֆինանսավորման համար: Բացի այդ, Սիրիան լքողների մեջ են «ՀԱՄԱՍ»-ի քաղաքական ղեկավարության ներկայացուցիչներ: Հաղորդվում է, որ նրանք տեղափոխվում են Գազայի հատված, Սուդան, Կատար և Լիբանան: Դամասկոսում գտնվող շարժման մի քանի հարյուր մասնակիցներից մնացել են միայն մի քանի տասնյակը:
Պարբերականի զրուցակիցը նշել է, որ Սիրիան լքելու որոշում շարժման անդամներիը կայացրել են երկրում շարունակվող քաղաքական ճգնաժամի ֆոնին, ինչի հետևանքով կտրուկ մեծացել է քաղաքացիական պատերազմի վտանգը:
Թերթը գրում է, որ Սիրիան լքելու իր որոշման մասին «ՀԱՄԱՍ»-ը տեղյակ չի պահել Սիրիայի իշխանություններին: Իսրայելական մեկ այլ պարբերական՝ Yediot Ahronet-ը, վկայակոչելով իր դիվանագիտական աղբյուրներին, նշում է, որ Սիրիայում այնուամենայնիվ մնացել են շարժման որոշ մասնակիցներ. նրանց նպատակն է կարգավորել հարաբերությունները Սիրիայի նոր իշխանությունների հետ, որոնք ենթադրաբար շուտով կփոխարինեն Բաշար Ալ-Ասադին:
Պաշտոնապես «ՀԱՄԱՍ»-ը կտրականապես հերքում է Սիրիայի հետ կապերը խզելու լուրերը: Կազմակերպության քաղբյուրոյի ղեկավարներից մեկի խոսքերով՝ Դամասկոսն իրոք «յոթից մեկը» լքել է, սակայն դա արվել է անձնական պատճառներով: Haarez-ի տվյալներով՝ Դամասկոսում մնացել են միայն մի քանի բարձրաստիճան պաշտոնյաներ, այդ թվում՝ քաղբյուրոյի ղեկավար Խալիդ Մաշաալը:
«ՀԱՄԱՍ»-ի և Սիրիայի ղեկավարության միջև լարվածության շուրջ լուրեր էին շրջանառվում դեռևս 2011 թ. մայիսին: Դեռ այդ ժամանակ հաղորդվում էր, որ «ՀԱՄԱՍ»-ը հրաժարվել է աջակցել Ասադի վարչակարգին՝ փորձելով չեզոքություն պահպանել:
