Ազգային ժողովի նախկին նախագահ, Հայաստանի Քրիստոնյա դեմոկրատական կուսակցության ղեկավար Խոսրով Հարությունյանը հույս ունի, որ խորհրդարանի նորանշանակ խոսնակ Սամվել Նիկոյանը նոր պաշտոնում իրեն դրսևորելու է որպես կոռեկտ, խոհեմ և բանիմաց մարդ: Այս մասին նա հայտնեց «Առաջին լրատվական»-ի հետ զրույցում:
«Ենթադրում եմ, որ նա լավագույն հնարավորությունն ունի իրեն դրսևորելու նոր կարգավիճակում, ինչպես որ դրսևորում էր ԱԺ փոխխոսնակի պաշտոնում: Սամվել Նիկոյանին փորձել եմ ճանաչել, հասկանալ և ըմբռնել, երբ նա զբաղվում էր Մարտի 1-ի իրադարձությունների հատուկ հանձնաժողովի գործերով: Պետք է ասել, որ նրան հաջողվեց այդ բարդ, խճճված խնդիրը շատ արժանապատիվ կեցվածքով տանել: Նիկոյանը փորձեց գտնվել բարձրության վրա և միաժամանակ դրսևորել պետության մոտեցումը»,- նկատեց Խոսրով Հարությունյանը:
Անդրադառնալով ԱԺ նոր փոխնախագահ Էդուարդ Շարմազանովին՝ նա նշեց, որ վերջինս երիտասարդ ու շատ խոստումնալից քաղաքական գործիչ է: «Նա ՀՀԿ-ի այն ակտիվ քաղաքական գործիչներից է, ով իր տարիքից անհամեմատ ավելի փորձառու է, ավելի բանիմաց: Շարմազանովին նման պաշտոնում նշանակելը խոսում է այն մասին, որ կուսակցությունում նրան վստահում են»,- ասաց ԱԺ նախկին նախագահը:
Հարությունյանի խոսքով, ԱԺ-ն պետական իշխանության ճյուղերից մեկը լինելուց զատ, քաղաքական կայացման և քաղաքական կադրեր պատրաստելու լրջագույն դարբնոց է: «ԱԺ-ն կոչված է քաղաքական մշակույթ ձևավորելու: Իհարկե, պետք է ասեմ, որ մեր ժամանակ Գերագույն խորհուրդը, առաջին գումարման Ազգային ժողովը իրենց քաղաքական որակներով, ներկայացուցչականությամբ, հայտնի քաղաքական գործիչների ընդգրկմամբ անհամեմատ տարբերվում էին այսօրվա ԱԺ-ից: Սա ակնհայտ է: Այդ տարիներին ձևավորվեցին պառլամենտարիզմի լավագույն ավանդույթները, որոնց մի մասն առ այսօր պահպանվել է, մի մասը՝ ոչ: Բայց մեծ իմաստով, ԱԺ-ն նույնիսկ շատ հարցերում իր խոցելի կառուցվածքով շարունակում է մնալ գլխավոր քաղաքական կառույցը: Այդ գործառույթը, անկախ խորհրդարանի կազմից և քաղաքական կառուցվածքից, երբեք չի դադարի»,- համոզմունք հայտնեց Խոսրով Հարությունյանը:
