Այս օրերին մի քանի փորձեր ենք արել «Մանկական Եվրատեսիլ» երգի մրցույթի մասնակիցների հետ, երեկ եղավ մրցույթի գլխավոր փորձը: Այս մասին «Առաջին լրատվական»-ի հետ զրույցում տեղեկացրեց «Մանկական Եվրատեսիլի» հաղորդավար Ավետ Բարսեղյանը:
Նրա խոսքով, փորձերն ընթանում են նորմալ, միջազգային չափանիշներին համապատասխան:
«Այնքան է փորձ արվում, որ բացառվեն անգամ փոքրիկ սխալները: Փորձում ենք անգամ այն դեպքերը, երբ տարբեր երկրների երեխաները կարող են հավաքել միևնույն միավորները»,- հավելեց Ա. Բարսեղյանը:
Ինչ վերաբերում է շոուի հայկական էլեմենտներին, ապա, ըստ հաղորդավարի, շատ գեղեցիկ է ստացվել հատկապես շոուի բացումը, որը «շատ հայկական` ազգագրական չէ, բայց հայկական էլեմենտներ կան»: «Եվրոպական որակով, հայկական շնչով շոու կլինի: Լուսային և ձայնային հրաշալի շոու է սպասվում»,- հավելեց հաղորդավարը` նշելով, որ բոլոր մասնակիցները հրաշք երեխաներ են:
Նրա խոսքով, Հայաստանն այս տարի ներկայացնող երգչուհի Դալիթան այս օրերին բարձր ջերմաստիճան է ունեցել, սակայն երեկ շատ լավ ելույթ է ունեցել:
