«Շրջակա միջավայրի ազդեցության փորձաքննության մասին» օրենքի նախագիծը չի բխում բնության, ժողովրդի, պետության շահերից: Այս մասին այսօր հայտարարեց բնապահպան-ակտիվիստ Մարիամ Սուխուդյանը և շեշտեց, որ այս լսումները պետք է լինեին մինչև օրենքի նախագիծը ԱԺ օրակարգ ներառելը:
Մ. Սուխուդյանի խոսքով, նախագծում բազմաթիվ բացթողումներ կան. «Ինչո՞ւ է նախարարությունը շտապում: Ասում են, թե 2007-ից նախապատրաստվում են փոփոխությունները, բայց ինչո՞ւ բնապահպանական հանրությունը տեղյակ չի եղել դրա մասին»:
Մ. Սուխուդյանը հայտարարեց, որ հասարակական լսումներին մասնակցող ակտիվիստները նկատել են, որ լսումների ժամանակ, երբ պետք է Արման Վերմիշյանը ելույթ ունենար և ներկայացներ հակափաստարկներն ու բոլոր վտանգավոր թերությունները, բնապահպանության նախարարության աշխատակիցը նշան է արել և ԱԺ օպերատորը մոտեցել է նախարարին ու դուրս հրավիրել նրան: Բոլոր լրագրողները նախարարի ետևից դուրս են եկել:
«Այդ բոյկոտը կազմակերպված էր»,- հայտարարեց Մ. Սուխուդյանը`միաժամանակ հավելելով, որ իրենք նկարահանել են բնապահպանության նախարարի կողմից լսումների ժամանակ արված այլ խախտումներ, ընդ որում՝ նախարարության աշխատակիցը հորդորել է իրենց դրանք չհրապարակել:
«Ամբողջ ելույթը գնալու է Youtube և տարածվելու է»,- խոստացավ բնապահպանը:
