Ռուսաստանի ընդդիմադիր «Ժողովրդավարական ընտրություն» շարժման առաջնորդ Վլադիմիր Միլովը հերքել է ՌԴ վարչապետ Վլադիմիր Պուտինի հայտարարությունն այն մասին, թե Ռուսաստանի ներկայիս ընդդիմադիրները 1990-ական թվականներին միլիարդի հասնող գողություններ են կատարել,- տեղեկացնում է РИА Новости-ն:
Հիշեցնենք, որ ուղիղ եթերում Ռուսաստանի քաղաքացիների հետ զրույցում Պուտինը, պատասխանելով հարցին, թե իրականում ի՞նչ է Նեմցովի, Վլադիմիր Ռիժկովի ու Վլադիմիր Միլովի ուզածը, ասել էր. «Գումար և իշխանություն, ի՞նչ են ուզում նրանք»: ՌԴ վարչապետը նաև ասել էր, որ 1990-ական թվականներին «նրանք քիչ միլիարդներ չեն փախցրել»: «Բայց կարծում եմ, որ եթե մենք նրանց դա թույլ տանք, ապա արդեն միլիարդներով չեն բավարարվի` ամբողջ Ռուսաստանը կվաճառեն», -հավելել էր Պուտինը:
«Մեզանից նրանք, ովքեր հիշատակվել են նրա արտահայտություններում, մտադիր ենք դատի տալ Պուտինին` մեզ զրպարտելու համար»,- ասված է ընդդիմադիրների տարածած հայտարարության մեջ, որի տակ ստորագրել են Վլադիմիր Միլովը, Բորիս Նեմցովը և Վլադիմիր Ռիժկովը ու Միխայիլ Կասյանովը: «Մեզանից ոչ մեկը, լինելով պետական ծառայող, ոչ մի կոպեկ ոչ մի անգամ չի վերցրել»,-հայտարարել է Միլովը: Ըստ աղբյուրի՝ 90-ական թվականներին Միլովն աշխատել է «Սիդանկո» արևտրային տանը, այնուհետև ՌԴ էներգետիկ դաշնային հանձնաժողովում, այնուհետև ՌԴ էներգետիկայի նախարարի խորհրդական է եղել, իսկ ահա 2002-ին մի քանի ամսով եղել է էներգետիկայի փոխնախարար: