ՀՀ կառավարության մամլո ծառայությունից «Առաջին լրատվական»-ին տեղեկացնում են, որ վարչապետ Տիգրան Սարգսյանի գլխավորությամբ կառավարությունում տեղի է ունեցել քննարկում՝ նվիրված Հայաստանի տնտեսության զարգացման նոր ծրագրի մշակմանը:
Միջոցառմանը մասնակցել են ՀԲ-ի, ՀՀ ԱԺ-ի խմբակցությունների և կառավարության ներկայացուցիչներ:
«Անհրաժեշտ է Հայաստանի համար մշակել մինչև 2020թ. ներառող տնտեսական նոր ծրագիր՝ իր հիմնական ուղղություններով, գերակայություններով և գործողություններով:
Հայաստանը մի քանի տարի առաջ արդեն իսկ մշակել էր Կայուն զարգացման ծրագիր, որը ենթարկվել է էական փոփոխությունների համաշխարհային ճգնաժամի արդյունքում»,- ասել է Տ. Սարգսյանը:
Կառավարության ղեկավարը նշել է, որ մեր երկիրն այսօր գտնվում է մրցակցության փուլում և մեր առջև առկա է խնդիր, թե ինչպես պետք է շարժվենք առաջ և ինչ մեթոդաբանությամբ:
«Վերջին 20 տարիներին Հայաստանն աճ է ապրում և այն զարգացնելու և առաջ տանելու համար պետք է օգտագործել Ձեր երկրի տնտեսական բոլոր առավելություններն ու աղբյուրները, տարբեր ոլորտներում առկա մարդկային ռեսուրսներն ու տնտեսական աճի ներուժը: Ըստ իս, Դուք դա կարող եք անել:
Ես Հայաստանի հարցով լավատես եմ, չնայած համաշխարհային մակարդակով գլոբալ անորոշություններին»,- նշել է ՀԲ-ի Եվրոպայի և Կենտրոնական Ասիայի տարածաշրջանի Հարավային Կովկասի երկրների դեպարտամենտի տարածաշրջանային տնօրեն Ասադ Ալամը:
Նա ասել է, որ ներկայում առկա բազմաթիվ անորոշությունների պարագայում պետք է մշակել ճկուն քաղաքականություն: Կառավարությունը պետք է մի քանի խիզախ միջոցառումների իրականացման որոշում կայացնի և նպատակային կերպով շարժվի այդ ճանապարհով:
«Անհրաժեշտ է միասնաբար սահմանել Հայաստանի զարգացման նոր տեսլականը: Եթե այդ ծրագրի 50 տոկոսն էլ իրականացվի՝ դա կլինի մեծ քայլ դեպի առաջ»,- նշել է ՀԲ-ի Եվրոպայի և Կենտրոնական Ասիայի տարածաշրջանի Հարավային Կովկասի երկրների դեպարտամենտի տարածաշրջանային տնօրենը: