Թուրքական Anadolu գործակալության փոխանցմամբ՝ երեկ երեկոյան Իրաքից Թուրքիա ժամանած ԱՄՆ փոխնախագահ Ջոզեֆ Բայդենն այսօր Անկարայում իր առաջին հանդիպումն ունեցել է Թուրքիայի Ազգային մեծ ժողովի (ԹԱՄԺ) նախագահ Ջեմիլ Չիչեքի հետ։ Ապա Բայդենն այցելել է Անըթքաբիր՝ Աթաթուրքի դամբարան, և հարգանքի տուրք մատուցել նրան։
Անըթքաբիրից Բայդենն ուղևորվել է Չանքայա նախագահական նստավայր, ուր նրան ընդունել է Թուրքիայի նախագահ Աբդուլլահ Գյուլը։ Այս հանդիպման մանրամասների վերաբերյալ ոչինչ չի նշվում։ Հանդիպումից հետո Բայդենը լքել է Անկարան և մեկնել Ստամբուլ, ուր պետք է մասնակցի «Գլոբալ նախաձեռնությունների գագաթնաժողովին», ինչպես նաև հանդիպում ունենա Պոլսո Հունաց պատրիարք Բարդուղեմիոսի հետ։
Հիշեցնենք, որ ավելի վաղ ԱՄՆ Պետդեպարտամենտի ներկայացուցիչ Սյուզան Ջոնսոն Կուկը ԱՄՆ Կոնգրեսում՝ կրոնական ազատությունների վերաբերյալ իր ելույթում հայտարարել էր, որ ԱՄՆ նախագահն ու պետքարտուղարն առաջնահերթ են համարում Ստամբուլի Հունաց պատրիարքարանի խնդիրների կարգավորումը։
