Business-Грузия-ի փոխանցմամբ՝ վիճակագրական տվյալներով, այս տարվա երկրորդ եռամսյակին Վրաստանում միջին աշխատավարձը կազմել է 680 լարի (1 լարին հավասար է 0.57 դոլարի)։ 2006 թվականի համեմատ, միջին աշխատավարձը Վրաստանում ավելացել է գրեթե 2.5 անգամ։
Ամենաբարձր միջին աշխատավարձը ստանում են բանկային ոլորտի աշխատակիցները՝ 1477 լարի, ինչը 2 անգամ ավելի է՝ համեմատած 2006 թվականի հետ։ 2006 թվականին այդ ցուցանիշը կազմում էր 448 լարի։
Ամենացածր միջին աշխատավարձը գրանցվել է կրթական ու գյուղատնտեսական ոլորտներում՝ 323 և 364 լարի համապատասխանաբար։ 2006 թվականին կրթական ոլորտի ցուցանիշը կազմել է 122 լարի, իսկ գյուղատնտեսական ոլորտինը՝ 146 լարի։
2006-2011 թվականներին աշխատավարձի ավելացման ամենաբարձր ցուցանիշը գրանցվել է առողջապահության ու սոցիալական ոլորտում՝ 354 տոկոսանոց աճ (143 լարիից հասնելով 507 լարիի)։ Երկրորդ տեղում է կոմունալ սպասարկման ոլորտը՝ 324 տոկոսանոց աճ (176 լարիից հասնելով 568 լարիի)։ Աշխատավարձի աճի ամենացածր տեմպը գրանցվել է ֆինանսական ոլորտում՝ 189 տոկոսանոց աճ (779 լարիից հասնելով 1477 լարիի)։
Հիշեցնենք, որ մեկ ամիս առաջ Վրաստանի նախագահ Միխեիլ Սաակաշվիլին հայտարարել էր, որ հաջորդ տարվանից սկսած՝ թոշակային փաթեթը կազմելու է 140 լարի։
