«Վարկած» ակումբի այսօրվա հյուրն էր ՀՌԱԿ ատենապետ Հարություն Առաքելյանը, որը խոսեց վարչապետին ուղղված ֆաքսերի ճակատագրի մասին և ներկայացրեց բաց ֆաքս համար 3-ը` հավելելով, որ այն վերջինը չէ:
Նա հայտարարեց, որ համաձայն իր ուսումնասիրությունների` 2009թ. մարտ ամսին, այսինքն` գործարանի պայթյունից օրեր առաջ «Նաիրիտ» գործարանի հաշվեհամարից 35 մլն դոլար է փոխանցվել մի շարք կազմակերպությունների, որից 22 միլիոն դոլարը գնացել է դանիական ինչ-որ ֆինանսական խմբի, 8 միլիոն դոլարը` «Ռայնովիլ փրոփերթի լիմիթեդ»-ի հաշիվներին, իսկ 60 մլն դրամ հատկացվել է ոմն Անդրանիկ Հովհաննիսյանի: Մնացած մոտ հինգ միլիոնով էլ մարվել են աշխատավարձի և այլ արտադրական պարտքեր:
Որտեղի՞ց գոյացավ այդ գումարը «Նաիրիտի» հաշվին` հարց է ուղղում Առաքելյանը: Ինչո՞ւ 35 մլն դոլարից ընդամենը 150 000 դոլար չներդրվեց պայթյունավտանգ արտադրամասը վերազինելու և տեխնիկապես անվտանգ դարձնելու գործին:
Նա նշեց` «Նաիրիտը» պարտք է «Երևան ՋԷԿ» ընկերությանը շուրջ յոթ միլիարդ դրամ: «Արդյոք 100 տոկոս պետական բաժնեմասով «Երևան ՋԷԿ» ընկերությունը անտոկոս ու անժամկե՞տ է վարկ տրամադրել «Ռայնովիլ փրոփերթի լիմիթեդ» օֆշորային մասնավոր ընկերությանը պատկանող «Նաիրիտ» գործարանին, իսկ «Երևան ՋԷԿ»-ը վարկերի միջոցով տարեկան 12 տոկոսով մարել է սպառած գազի դիմաց իր պարտավորությունները «ՀայՌուսգազարդի» հանդեպ»:
Հ. Առաքելյանը նշեց, որ «Նաիրիտ» գործարանը արհեստական սնանկացման ճանապարհ է բռնել:
