Ադրբեջանական APA լրատվական գործակալության փոխանցմամբ՝ հաջորդ շաբաթ ԱՄՆ Հելսինկյան հանձնաժողովում տեղի են ունենալու լսումներ՝ նվիրված Ղարաբաղյան և այլ չկարգավորված հակամարտություններին։
Լսումների ժամանակ քննարկվելու են հակամարտությունների ներկայիս իրավիճակը, դրանց կարգավորմանը խոչընդոտող գործոնները, ռազմական գործողությունների վերսկսման լուրջ վտանգի առկայությունը և այլն։
Մասնավորապես, դեկտեմբերի 7-ին տեղի են ունենալու «Կովկասի հակամարտություններ. զարգացման հեռանկարներ» խորագրով լսումները։ Դրանց մասնակցելու են վերլուծաբաններ, պաշտոնատար անձինք, ամերիկացի սենատորներ, ինչպես նաև Քարնեգիի հիմնադրամի Կովկասի հարցերով ավագ փորձագետ Թոմաս դե Վաալը, Բրուքինգսի ինստիտուտի գլխավոր գիտաշխատող Ֆիոն Հիլը և ԱՄՆ-ի արտաքին քաղաքականության խորհրդի աշխատակից Ուեյն Մերին։
Միջոցառման կազմակերպիչները նշել են. «Խորհրդային Միության փլուզումից 20 տարի անց չկարգավորված հակամարտությունները շարունակում են մնալ ամենագլխավոր խնդիրներից մեկը։ Չնայած Ղարաբաղյան հակամարտության կարգավորման հարցում ԵԱՀԿ-ի միջնորդությանը, արդյունքները հիասթափեցնող են։ 2008 թվականին տեղի ունեցած ռուս-վրացական պատերազմից և Մոսկվայի կողմից Աբխազիայի ու Հարավային Օսիայի ճանաչումից հետո այդ հակամարտության կարգավորումն առավել հեռացված է թվում»։