ԲՀԿ հանդեպ հալածանքներ չկան, կոալիցիոն մեր հարաբերությունները նորմալ են: Այսօր կայացած մամուլի ասուլիսում այս մասին հայտարարեց ՀՀԿ փոխնախագահ Ռազմիկ Զոհրաբյանը:
«Եթե հալածանքներ լինեին, ԲՀԿ-ն անպայման կպատասխաներ: ԲՀԿ նկատմամբ քաղաքական հետապնդումներ չկան: Ինչպե՞ս կարող է ԲՀԿ ղեկավարը պատասխանել առանձին վերլուծությունների: Եթե ՀԱԿ-ը փորձում է հոգեբանական ճեղքվածք առաջացնել, ապա դա նրան չի հաջողվի: Խորհրդարանական ընտրությունները մոտ են, և պայքարի բոլոր ձևերն ընդունելի են»,- նկատեց նա:
Անդրադառնալով Սյունիքի մարզպետ Սուրեն Խաչատրյանի և կին գործարար Սիլվա Համբարձումյանի միջև «Արմենիա Մարիոթ» հյուրանոցում տեղի ունեցած հայտնի միջադեպին` Ռազմիկ Զոհրաբյանը նկատեց, որ կուսակցական մոտեցում այդ հարցին, անշուշտ, լինելու է, սակայն առայժմ նախաքննություն է ընթանում, և ճիշտ չի լինի խոսել այս մասին:
«Այդ հարցն ինձ համար էլ հակասական է մնում, մեկն ասում է` բռնություն է գործադրվել, մյուսն ասում է` նման բան չի եղել: Չեմ ուզում իրավական դաշտ մտնել: Բայց եթե պարզվի, որ նա հարվածել է Համբարձումյանին, ապա հարցը իրավական դաշտում էլ կլուծվի: Ես ընդունում եմ կնոջ և տղամարդու իրավահավասարությունը: Ամեն դեպքում, հասարակական վայրերում, ինչպեսև ԱԺ-ում, պետք է զուսպ լինել, ես դրա կողմնակիցն եմ: Գիտենք` կնոջ հանդեպ ինչպես պետք է վարվել: Հանրապետականը կին կուսակցականների մեծ բանակ ունի»,- նկատեց նա:
Վերադառնալով ԲՀԿ Ջերմուկի տարածքային կառույցի ղեկավարի` օրերս թմրամիջոցներ պահելու կասկածանքով ձերբակալության դեպքին և պատասխանելով լրագրողներից մեկի հարցին` կա՞ն մեխանիզմներ, որոնք գործում են ՀՀԿ-ում կուսակցության շարքեր մարդիկ ընդունելիս, ՀՀԿ փոխնախագահը նկատեց.
«Կուսակցական կառույցներում նարկոդիսպանսերներ չկան, որ մեկին ընդունելիս ասենք` մի հատ փչեք, տեսնենք` խմած եք կամ թմրանյութ օգտագործել եք: Ընթացքում, երբ պարզվում է, որ մարդը ալկոհոլիկ կամ թմրամոլ է, չեզոքացվում է: Դա տեղի է ունենում ներքին կարգով, որովհետև մենք թմրամոլներ և ալկոհոլիկներ չենք ընդունում մեր կուսակցություն»:
Զոհրաբյանի խոսքով` առաջիկա խորհրդարանական ընտրություններին կուսակցությունը գնում է առավել երիտասարդացված կազմով:
«Տարբեր առիթներով ասել եմ, որ մեր համամասնական ցուցակում թարմացումներ լինելու են: Բայց այնպես չէ, որ բոլորը երիտասարդներ կլինեն, դրանից կարող է հասարակական անվստահություն առաջանալ, կլինեն նաև տարիքավորներ, սակայն ավելի քիչ, իսկ գործարար պատգամավորների մասով Սերժ Սարգսյանն ասել է` քաղաքական իշխանությունը պետք է տարանջատվի գործարարությունից»,- ամփոփեց նա: