Գլոբալ ճգնաժամի մասին բանկիրներին հայտնի է դարձել դրա սկսելուց 6 ամիս առաջ. այդ մասին է Wikileaks-ի հրապարակած դիվանագիտական փաստաթղթերից մեկը: 2008թ.-ի մարտին Անգլիայի բանկի ղեկավար Մերվին Քինգը փորձում էր համատեղ գործունեություն ծավալել ԱՄՆ-ի, Շվեյցարիայի և Ճապոնիայի ֆինանսական ղեկավարների հետ` ցանկանալով լուծել մեծ բանկերի կապիտալիզացիայի հարցը` մինչև ֆինանսական ճգնաժամը: Այս տեղեկությունը նշված է Լոնդոնում ԱՄՆ-ի դեսպան Ռոբերտ Թաթլի` պետդեպարտամենտին հղված հեռագրում:
Այն ժամանակ Քինգը պատմել է ամերիկացի դեսպանին, որ բրիտանական բանկերին անհրաժեշտ է կապիտալի ներմուծում, և որ կենտրոնական բանկերը (Անգլիայի բանկը և Դաշնային պահուստային համակարգը) պետք է կենտրոնացնեն իրենց գործունեությունը: Քինգի խոսքերով, ԱՄՆ-ի, Մեծ Բրիտանիայի և Շվեյցարիայի կենտրոնական բանկերի ղեկավարներն ու ֆինանսների նախարարները պետք է համախմբեն իրենց ուժերը և բանակցություններ վարեն ֆինանսական առումով վստահության մեծ պաշար ունեցող այլ պետությունների հետ: Ճգնաժամի մասին լուրերից դեռ մի քանի ամիս առաջ, ըստ Թաթլի, Անգլիայի խոշորագույն բանկերի` Շոտլանդիայի թագավորական բանկի, Barclays-ի, HSBC –ի և Lloyds-ի վրա արդեն դժվար էր նայել:
2008թ.-ին ամերիկյան Lehman Brothers ներդրումային բանկը փլուզվեց: Այդ ժամանակ ԱՄՆ-ի դեսպանը Լոնդոնում Վաշինգտոն փոխանցեց Մերվին Քինգի կարծիքը, որ յոթ ամենամեծ տնտեսություններով պետությունները չեն կարող լուծել «գլոբալ տնտեսական հարցերը»: «G7-ը համարյա չի աշխատում տնտեսական բնագավառում», – ասել է Քինգը` ընդունելով, որ այս հարցի լուծման համար նոր միջազգային խումբ է անհրաժեշտ:
«Քինգի առաջարկությունները պատահական արտահայտած մտքեր չէին խոսակցության ընթացքում»,- ասված է դիվանագիտական հեռագրի մեջ:
Այս մասին գրում է The Guardian-ը: