Грузия Online-ի փոխանցմամբ՝ Հարավային Կովկասում և Կենտրոնական Ասիայում ՆԱՏՕ-ի հատուկ ներկայացուցիչ Ջեյմս Ափաթուրայը Երևանում ՆԱՏՕ-ի Տեղեկատվական կենտրոնի կազմակերպած տեսակամրջի ժամանակ հայտարարել է, որ ՆԱՏՕ-ին Վրաստանի անդամակցությունը հիմնականում կախված է արդար ընտրությունների անցկացումից։
Խոսքն այս դեպքում 2012 թվականին Վրաստանում կայանալիք խորհրդարանական և 2013 թվականին կայանալիք նախագահական ընտրությունների մասին է։ Ըստ Աթափուրայի՝ եթե Վրաստանը կարողանա արժանիորեն անցկացնել դրանք, ապա դա զգալիորեն կնպաստի ՆԱՏՕ-ին Վրաստանի անդամակցության գործընթացին։
Նա հավելել է, որ Վրաստանը մեծ ջանքեր է գործադրում և զգալի առաջընթաց է գրանցել ՆԱՏՕ-ին անդամակցելու ուղղությամբ։ Ափաթուրայն արդար ընտրությունների անցկացումը կարևորել է նաև Հայաստանի համար։
Հիշեցնենք, որ այս տարվա նոյեմբերի 10-ին Ափաթուրայը Վրաստանում հայտարարել էր, որ Վրաստանն անդամակցելու է ՆԱՏՕ-ին.
«ՆԱՏՕ-ն դրական է գնահատում վերջին շրջանում Վրաստանի իրականացրած բարեփոխումները։ Այդ բարեփոխումների շնորհիվ ՆԱՏՕ-ին Վրաստանի անդամակցության գործընթացը դարձել է անխուսափելի։ ՆԱՏՕ-ն որոշում է ընդունել Վրաստանի անդամակցության մասին»։