Ըստ ազգային թեժ գծի տվյալների` 2011 թ. հունվարից մինչև նույն թվականի սեպտեմբեր կենտրոնը մոտ 2000 զանգ է ստացել բռնության վերաբերյալ: Այս մասին «Առաջին լրատվական»-ի հետ զրույցում տեղեկացրեց Կանանց իրավունքների կենտրոնի հասարակայնության հետ կապերի պատասխանատու Դիանա Սարգսյանը`խոսելով ընտանեկան բռնության և հայտարարված 16-օրյակի շուրջ:
Ըստ նրա`ամենաշատը զանգեր են գրանցվում ընտանեկան բռնության, հոգեբանական և ֆիզիկական բռնության վերաբերյալ, իսկ ամենավերջին տեղում են սեռական բռնությունները: Դ. Սարգսյանի համոզմամբ`շատ կանայք, բռնության ենթարկվելով, վախենում են և չեն համարձակվում այդ մասին բարձրաձայնել:
Անդրադառնալով «Ընդդեմ գենդերային բռնության ակտիվության 16-օրյակ»-ի միջոցառումներին`ասաց, որ նոյեմբերի 29-ին՝ ժամը 14.00-ին, Հյուսիսային պողոտայում կկազմակերպվի «Լուռ վկաներ» ակցիան, որի շրջանակներում սպիտակ զգեստներ և դիմակներ կրող կանայք լուռ կքայլեն Հյուսիսային պողոտայի ամբողջ երկայնքով: «Կանայք անցորդներին կբաժանեն բուկլետներ և թռուցիկներ ընտանեկան բռնության վերաբերյալ, ինչպես նաև կանանց համար խորհրդատվության թեժ գծերը կտարածվեն թռուցիկների տեսքով: Կանայք նաև ֆլեշմոբ կանցկացնեն, որով կգրեն «Ո՛չ բռնությանը» բառը»,- մանրամասնեց Դ. Սարգսյանը`բռնության ենթարկված կանանց հորդորելով չլռել: